قاشاعانداعى مەردىگەر كومپانيا قازاقستان ۇكىمەتىمەن اراداعى داۋ-دامايعا پىكىر ءبىلدىردى
استانا. قازاقپارات - NCOC (North Caspian Operating Company) قازاقستان ۇكىمەتىمەن اراداعى تورەلىك داۋعا وراي پىكىر ءبىلدىردى.
«قازاقستان رەسپۋبليكاسى مەن سولتۇستىك كاسپي بويىنشا ءونىمدى ءبولۋ تۋرالى كەلىسىم بويىنشا مەردىگەر كومپانيالار (KMG Kashagan B. V. ەنشىلەس ۇلتتىق مۇناي كومپانياسىن قوسپاعاندا) اراسىندا كەلىسىمنىڭ بەلگىلى ءبىر ەرەجەلەرىن قولدانۋعا قاتىستى ءبىرقاتار داۋلى ماسەلە بار. ول تورەلىككە جانە كەلىسىمگە سايكەس ساراپشىلىق انىقتاۋعا جاتادى. مەردىگەر كومپانيالار كەلىسىمگە، ق ر زاڭناماسىنا سايكەس جانە ستاندارتتار مەن الدىڭعى قاتارلى تاجىريبەنى قولدانا وتىرىپ ارەكەت ەتتىك دەپ سانايدى. قاراۋدىڭ قۇپيا سيپاتىنا بايلانىستى قوسىمشا پىكىر بىلدىرە المايمىز» دەلىنگەن NCOC تاراتقان اقپاراتتا.
بۇعان دەيىن Bloomberg باسىلىمى قازاقستان قاشاعان كەن ورنىن يگەرىپ جاتقان حالىقارالىق مۇناي الپاۋىتتارىنا قارسى تورەلىك تالاپ قويۋ سوماسىن 150 ميلليارد دوللارعا (67,3 تريلليون تەڭگە) دەيىن ارتتىرعانىن، شىعىن بويىنشا داۋعا قوسىمشا الىنباي قالعان پايدا ءۇشىن وتەماقى تالاپ ەتكەندىگىن جازعان بولاتىن.
ال كەشە ەنەرگەتيكا مينيسترلىگى بۇل جايت قازاقستان ۇكىمەتى مەن مەردىگەر كومپانيالار تورەلىك راسىمدەر اياسىندا شەشۋگە نيەتتى ەرەكشە كوممەرتسيالىق داۋ ەكەندىگىن مالىمدەگەن ەدى.
ايتا كەتەيىك، وتكەن جىلدىڭ كوكتەمىندە قازاقستان ۇكىمەتى ەلدىڭ باتىسىندا مۇناي-گاز كەن ورىندارىن يگەرىپ جاتقان North Caspian Operating Company N. V. جانە Karachaganak Petroleum Operating BV وپەراتورلارىن حالىقارالىق سوتقا بەردى.
مەملەكەت كومپانيالاردى تەندەر ءتارتىبىن بۇزدى، قاشاعانداعى مەردىگەر مىندەتتەمەسىن تولىق ورىنداعان جوق دەپ ايىپتادى.
Bloomberg اگەنتتىگى 5-ساۋىردە قازاقستان بيلىگى سەرىكتەستەرىنىڭ قاشاعان بويىنشا 13 ميلليارد، قاراشىعاناق بويىنشا 3,5 ميلليارد دوللار شىعىندى ۇستاپ قالعانىنا نارازى بولىپ وتىرعانىن اتاپ كورسەتتى.
سول ۋاقىتتا ەنەرگەتيكا ءمينيسترى الماسادام ساتقاليەۆ قاراشىعاناق جانە قاشاعان كەن ورىندارىنىڭ وپەراتورلارىنا قارسى سوتقا شاعىم بەرىلگەنىن، ول قازاقستان حالقىنىڭ مۇددەسىن قورعاۋ ماقساتىندا تۇسىرىلگەنىن اتاپ وتكەن ەدى.
«سوما - 3,5 ميلليارد دوللار جانە 13 ميلليارد دوللار»، - دەپ تۇسىندىرگەن بولاتىن الماسادام ساتقاليەۆ.
اۆتور
مارلان جيەمباي
