قاشاعان كەن ورنىن يگەرەتىن كومپانيادان 2,3 تريلليون تەڭگە ماجبۇرلەپ ءوندىرىپ الۋ ءۇشىن ءىس قوزعالدى
اتىراۋ. KAZINFORM - قاشاعان كەن ورنىن يگەرەتىن NCOC كومپانياسىنا سالىنعان 2,3 تريلليون تەڭگە كولەمىندەگى ەكولوگيالىق ايىپپۇلدى ماجبۇرلەپ ءوندىرۋ ءۇشىن اتقارۋشىلىق ءىس قوزعالدى. اتىراۋ وبلىستىق ەكولوگيا دەپارتامەنتىنىڭ مالىمەتىنشە، ءىس مەملەكەتتىك سوت ورىنداۋشىلارىنىڭ قاراۋىنا بەرىلگەن.
اتىراۋ وبلىسى بويىنشا ەكولوگيا دەپارتامەنتىنىڭ باسشىسى اسقار ءجۇسىپوۆتىڭ ايتۋىنشا، وتكەن جىلى NCOC كومپانياسىنا قاتىستى 7 اكىمشىلىك ءىس قوزعالعان. جالپى ايىپپۇل كولەمى 2,3 تريلليون تەڭگەنى قۇرايدى. وسى ىستەر بويىنشا بارلىق سوت وتىرىسى اياقتالعان.
- دەپارتامەنتتىڭ بارلىق ءىس-ارەكەتى زاڭدى دەپ تانىلدى. وسى جىلدىڭ ءبىرىنشى جارتىجىلدىعىندا 7 اكىمشىلىك ءىستىڭ التاۋى بويىنشا جالپى كولەمى 1,5 ميلليارد تەڭگەنى قۇرايتىن ايىپپۇل جەرگىلىكتى بيۋدجەتكە ءتۇستى، - دەدى اسقار ءجۇسىپوۆ.
ءوڭىردىڭ باس ەكولوگى اسقار ءجۇسىپوۆتىڭ مالىمەتىنە سۇيەنسەك، قالعان ءبىر ءىس، ياعني 2,3 تريلليون تەڭگە ايىپپۇلدى ءوندىرۋ ءۇشىن ماجبۇرلەپ ورىنداۋ تۋرالى اتقارۋشىلىق ءىس قوزعالدى. قازىر بۇل ءىس ادىلەت دەپارتامەنتىنىڭ مەملەكەتتىك سوت ورىنداۋشىلارىنىڭ قاراۋىندا.
- اتقارۋشىلىق قۇجاتتى ورىنداۋ مەرزىمى - 2 اي. 20 -شىلدەدە ادىلەت دەپارتامەنتىنە ماجبۇرلەپ وندىرۋگە جولداندى. دەپارتامەنتتىڭ سوت ورىنداۋشىلارى اتقارۋ پاراعى بويىنشا اتقارۋشىلىق ءىس قوزعادى. مەندەگى اقپار بويىنشا NCOC كومپانياسىنىڭ مۇلىكتەرىنە تىيىم سالىندى، - دەپ پىكىر ءبىلدىردى اسقار ءجۇسىپوۆ.
ەسكە سالايىق، كومپانيا ايىپپۇلمەن كەلىسپەيتىنىن مالىمدەپ، حالىقارالىق تورەلىك راسىمدەرگە جۇگىنسە، قازاقستان تاراپى سوت شەشىمى زاڭدى كۇشىنە ەنگەنىن جانە ونى ورىنداۋ مىندەتتى ەكەنىن اتاپ ءوتتى
ايتا كەتەيىك، قاشاعان ءىرى مۇناي جوباسىنا قاتىستى 2,3 تريلليون تەڭگە (5,1 ميلليارد دوللار شاماسىندا) كولەمىندەگى تالاپتى ق ر ەكولوگيا جانە تابيعي رەسۋرستار مينيسترلىگى 2023 -جىلى كۇكىرتتى شامادان تىس ساقتاۋ فاكتىلەرى بويىنشا ەنگىزگەن ەدى.
