بەكتەنوۆ قاۋىپسىزدىك دەڭگەيى تومەن باسپانالاردى باقىلاۋعا الۋدى تاپسىردى
استانا. KAZINFORM - قاۋىپسىزدىك دەڭگەيى تومەن باسپانالاردى ەرەكشە باقىلاۋعا الۋ كەرەك. بۇل تۋرالى بۇگىن ۇكىمەت وتىرىسىندا پرەمەر-مينيستر ولجاس بەكتەنوۆ ءمالىم ەتتى.
- جۇمىس ىزدەپ، تابىس تابۋعا كەلگەن ادامدار كوپ جاعدايدا قاراپايىم، ارزان باسپانانى جالعا الادى. ال ونداي ۇيلەردىڭ قاۋىپسىزدىك دەڭگەيى تومەن، ءتىپتى كەيبىرى اپاتتى جاعدايدا بولادى. اتاپ ايتقاندا، تەك ەلوردانىڭ وزىندە وسىنداي 860 نىسان ەسەپكە الىنعان. وتكەن قىستا ولاردا 30-عا جۋىق ءورت وقيعاسى بولدى. نەگىزگى سەبەپتەرى - ەلەكتر سىمدارىنىڭ قىسقا تۇيىقتالۋى، وتتى ابايسىز پايدالانۋ جانە قاراپايىم ءورت قاۋىپسىزدىگى تالاپتارىن ساقتاماۋ، - دەدى ولجاس بەكتەنوۆ.
وسى ورادا پرەمەر-مينيستر اكىمدىكتەرگە ىشكى ىستەر جانە توتەنشە جاعدايلار مينيسترلىكتەرىمەن بىرلەسىپ، وسىنداي ءۇي-جايلاردى ەرەكشە باقىلاۋعا الۋدى تاپسىردى.
- سونداي-اق ءورت شىعۋ قاۋپى بار جاعدايلاردى انىقتاپ، شۇعىل شارالار قابىلداۋ ءۇشىن تۇراقتى رەيدتەر وتكىزىپ تۇرۋ قاجەت، - دەدى ۇكىمەت باسشىسى.
بۇعان دەيىن حابارلانعانداي، بۇگىن ۇكىمەت وتىرىسىندا پرەمەر-مينيستر ولجاس بەكتەنوۆ ءورت قاۋىپسىزدىگى ماسەلەسى بويىنشا جاۋاپتى ۆەدومستۆولارعا رەيد جۇرگىزۋدى تاپسىردى.
