ق ر پرەزيدەنتى توگو باسشىسىنا: حالىقارالىق كۇردەلى جاعدايدا كۇش بىرىكتىرۋ كەرەك

مەملەكەت باسشىسى قاسىم- جومارت توقايەۆ اقوردادا قازاقستانعا رەسمي ساپارمەن كەلگەن توگو رەسپۋبليكاسىنىڭ پرەزيدەنتى فور ەسسوزيمنا گناسسينگبەمەن كەلىسسوز جۇرگىزدى. Kazinform بۇل تۋرالى اقوردانىڭ باسپا ءسوز قىزمەتىنە سىلتەمە جاساپ حابارلايدى.

قاسىم- جومارت توقايەۆ فور گناسسينگبەگە ءىلتيپات ءبىلدىرىپ، ونىڭ قازاقستانعا تاريحي ساپارى ەكىجاقتى قارىم- قاتىناستىڭ جاڭا كەزەڭىنە جول اشاتىنىن اتاپ ءوتتى.

«قازاقستان ءسىزدىڭ ەلىڭىزبەن جان- جاقتى ىنتىماقتاستىقتى ىلگەرىلەتۋگە مۇددەلى. بۇعان دەيىنگى بەيرەسمي اڭگىمەلەسۋ بارىسىندا ءبىز قازاقستان مەن توگو اراسىندا ىقپالداستىق ورناتۋ ءۇشىن ءوزارا مۇددەنى كوزدەيتىن قولدا بار مۇمكىندىكتەردى تالقىلادىق. ارينە، ەلدەرىمىز ءارتۇرلى قۇرلىقتا، ءارتۇرلى ايماقتا ورنالاسقان. ءبىراق بىزگە قازىرگىدەي حالىقارالىق كۇردەلى جاعدايدا كۇش بىرىكتىرۋ كەرەك. وسى ورايدا قازاقستان مەن توگو، سونداي- اق باسقا دا مەملەكەتتەر حالىقارالىق قاتىناستاردى قالىپقا كەلتىرۋ ءۇشىن ءبىر بولۋى قاجەت»، - دەدى پرەزيدەنت.

كەزدەسۋ بارىسىندا مەملەكەت باسشىسى قازاقستان مەن توگو كۇش جۇمىلدىرا وتىرىپ، الداعى ۋاقىتتا اتقارا الاتىن نەگىزگى سالالاردى ايقىندادى. قاسىم- جومارت توقايەۆتىڭ پىكىرىنشە، ەكىجاقتى جانە حالىقارالىق كۇن ءتارتىبىن ىلگەرىلەتۋ ءۇشىن تۇراقتى ديالوگ ورناتۋ قاجەت.

ءوز كەزەگىندە پرەزيدەنت فور گناسسينگبە جىلى شىراي تانىتقانى ءۇشىن قاسىم- جومارت توقايەۆ پەن قازاقستان حالقىنا العىس ايتتى

«مەن سىزگە جانە بارشا قازاقستان جۇرتشىلىعىنا توگو حالقىنىڭ ىستىق ىقىلاسىن جەتكىزگىم كەلەدى. ەكى ەلدىڭ يگىلىگى جولىنداعى ىنتىماقتاستىققا تىڭ سەرپىن بەرۋ ءۇشىن زور مۇمكىندىك بار»، - دەدى توگو پرەزيدەنتى.

بۇدان كەيىن پرەزيدەنتتەر ەكى ەل دەلەگاتسيالارىنىڭ قاتىسۋىمەن كەڭەيتىلگەن قۇرامدا كەلىسسوز جۇرگىزدى.

مەملەكەت باسشىسى قاسىم- جومارت توقايەۆتىڭ شاقىرۋىمەن 27-28-قاراشادا توگو رەسپۋبليكاسىنىڭ پرەزيدەنتى فور ەسسوزيمنا گناسسينگبە قازاقستانعا رەسمي ساپارمەن كەلەتىنىن بۇعان دەيىن جازعان بولاتىنبىز. بۇگىن ق ر پرەزيدەنتى اقوردادا فور ەسسوزيمنا گناسسينگبەنى سالتاناتتى تۇردە قارسى الدى.

اۆتور

گۇلميرا الياكپاروۆا