ق ر پرەزيدەنتى سينگاپۋردىڭ ۇلتتىق قاۋىپسىزدىك جونىندەگى ۇيلەستىرۋشى مينيستر تەو چي حيندى قابىلدادى
استانا. KAZINFORM - مەملەكەت باسشىسى سينگاپۋردىڭ اعا ءمينيسترى - ۇلتتىق قاۋىپسىزدىك جونىندەگى ۇيلەستىرۋشى مينيستر تەو چي حيندى قابىلدادى، دەپ حابارلايدى اقوردانىڭ باسپا ءسوز قىزمەتى.
قاسىم-جومارت توقايەۆ پەن تەو چي حين ەكى ەل اراسىنداعى ساياسي جانە ەكونوميكالىق ىنتىماقتاستىقتىڭ قازىرگى جاي-كۇيى مەن دامۋ پەرسپەكتيۆاسىن تالقىلادى.
مەملەكەت باسشىسى استانانىڭ سەنىمدى ديالوگقا، بەرىك ساۋدا جانە ينۆەستيتسيالىق بايلانىستاردى ودان ءارى نىعايتۋعا نەگىزدەلگەن ەكىجاقتى سەرىكتەستىكتىڭ جاڭا كەزەڭىنە جول اشۋعا دايىن ەكەنىنە توقتالدى.
پرەزيدەنت بۇگىنگى 46- سينگاپۋر لەكسياسىندا ايماقتىق قاۋىپسىزدىك، تۇراقتىلىق جانە ورنىقتى دامۋ تاقىرىبى بويىنشا ءسوز سويلەۋ زور مارتەبە ەكەنىن جەتكىزدى.
سينگاپۋردىڭ اعا ءمينيسترى تەو چي حين وڭتۇستىك-شىعىس ازيانى زەرتتەۋ ينستيتۋتىنا كەلگەنى ءۇشىن قاسىم-جومارت توقايەۆقا العىس ايتتى. ول الەۋمەتتىك-ساياسي ۇردىستەردى، وڭىردەگى قاۋىپسىزدىك ماسەلەلەرىن جانە ەكونوميكالىق جاعدايدى زەرتتەۋدە قازاقستان پرەزيدەنتىنىڭ ءدارىسى وزەكتى سانالاتىنىنا توقتالدى.
مەملەكەت باسشىسى مەن سينگاپۋردىڭ اعا ءمينيسترى حالىقارالىق جانە ايماقتىق كۇن تارتىبىندەگى ماسەلەلەر جونىندە پىكىر الماستى.
كەزدەسۋ سوڭىندا قاسىم-جومارت توقايەۆ تەو چي حينگە ءوزىنىڭ «بەلاسۋ» كىتابىنىڭ اعىلشىن تىلىندەگى نۇسقاسىنا قولتاڭبا بەردى. ايتا كەتەرلىگى، تەو چي حين بۇل كىتاپتى قازاقستانعا جاساعان ساپارىندا ساتىپ الىپ، زور ىقىلاسپەن وقىپ شىققان.
اۆتور
ايدار وسپاناليەۆ
