ق ر ۇكىمەتى شەت ەلدەردەن كولىك اكەلۋ جانە ولاردى پايدالانۋ تالاپتارىن بەكىتتى

ۇكىمەت باسشىسى ءاليحان سمايىلوۆ شەت مەمەلەكەتتەردە تىركەلگەن كولىكتەردى قازاقستانعا اكەلۋ جانە ولاردى پايدالانۋ تالاپتارىن بەكىتتى، دەپ حابارلايدى قازاقپارات.

پرەمەر- مينيستر قول قويعان قاۋلى primeminister.kz سايتىندا جاريالاندى.

قۇجاتقا قوسا ۇسىنىلعان قوسىمشادا:

باسقا مەملەكەتتىڭ قۇزىرەتتى ورگانىندا تىركەلگەن اۆتوكولىك قۇرالدارىنىڭ قازاقستان رەسپۋبليكاسىنىڭ اۋماعىنا كىرۋ (اكەلىنۋ) ءتارتىبى مەن تالاپتارى؛

باسقا مەملەكەتتىڭ قۇزىرەتتى ورگانىندا تىركەلگەن اۆتوكولىك قۇرالدارىن قازاقستان رەسپۋبليكاسىنىڭ اۋماعىندا پايدالانۋ قاعيدالارى مەن تالاپتارى جازىلعان.

قاۋلى العاشقى رەسمي جاريالانعان كۇنىنەن كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى.

ەسكە سالايىق، بيىلعى 23 -قاڭتار - 1-شىلدە ارالىعىندا قازاقستانعا 2022 -جىلدىڭ 1-قىركۇيەگىنە دەيىن زاڭسىز اكەلىنگەن كولىكتەر زاڭداستىرىلدى. ناتيجەسىندە 220 مىڭنان استام اۆتوكولىك تىركەلدى.

ال 2022 -جىلدىڭ 1-قىركۇيەگىنەن كەيىن اكەلىنگەن كولىكتەر زاڭنىڭ بارلىق تالاپتارىنا ساي، جەڭىلدىكسىز تىركەۋگە جاتادى.

اۆتور

گۇلميرا الياكپاروۆا