نيگەريادا 10,5 ميلليون بالا مەكتەپكە بارمايدى

استانا. KAZINFORM - الەمدە شامامەن 72 ميلليوننان استام بالا مەكتەپكە بارمايدى دەپ حابارلايدى 24kz.

ال، 800 ميلليونعا جۋىق ەرەسەكتىڭ ساۋاتى جوق، ياعني قالىپتى ءومىر ءسۇرۋ ءۇشىن قاجەتتى ءبىلىم الماعان. مۇنداي دەرەكتەردى Humanium ۇيىمى كەلتىرىپ وتىر.

قۇرىلىم وكىلدەرى كوپ ەلدەردە مەكتەپ جەتىسپەۋشىلىگى مەن عيماراتتاردىڭ تالاپقا ساي جابدىقتالماۋىن العا تارتادى. ماسەلە اسىرەسە، ساحارادان افريكاعا دەيىنگى ايماقتاردا ۋشىعىپ تۇر. ازيا مەن ەۋروپانىڭ كەي وڭىرلەرىندە دە مەكتەپ ينفراقۇرىلىمى تالاپقا ساي ەمەس.

نيگەريادا شامامەن 10,5 ميلليون بالا مەكتەپكە بارمايدى. بۇل - الەم بويىنشا ەڭ جوعارى كورسەتكىش. ويتكەنى مۇندا مەكتەپ جاسىنداعى بالا سانى تىم كوپ، ال ولاردى وقىتاتىن ءبىلىم بەرۋ مەكەمەلەرى تاپشى. بۇدان بولەك، وقۋ ورىندارى دۇرىس جابدىقتالماعان، ابدەن توزىعى جەتىپ، جارامسىز كۇيگە ەنگەن. مەكەمەلەردىڭ قاۋىپسىزدىگى مەن عيمارات ساپاسىنىڭ سىن كوتەرمەۋى ءتۇرلى وقىس جاعدايلارعا اكەپ سوعۋدا. تاياۋدا نيگەريانىڭ دجوس شتاتىندا مەكتەپ عيماراتى قۇلاپ، 22 بالا قايتىس بولدى.

ۇكىمەت ءبىلىم بەرۋ قولجەتىمدىلىگىن ارتتىرۋعا باعىتتالعان جوبالاردى جۇزەگە اسىرىپ جاتقانىمەن مەكتەپ ءالى دە جەتكىلىكسىز. ساراپشىلار مۇنى قارجىلاندىرۋدىڭ تاپشىلىعىمەن جانە ۇزدىكسىز جالعاسىپ جاتقان قارۋلى قاقتىعىستاردىڭ كەسىرىنەن مەكتەپ قۇرىلىسىن جۇرگىزۋدىڭ مۇمكىن بولماۋىمەن بايلانىستىرادى.

مالاۆيدە مەكتەپ تاپشى

وڭتۇستىك افريكاداعى مەملەكەت مالاۆيدە دە ءبىلىم بەرۋ جۇيەسى دۇرىس جولعا قويىلماعان. ويتكەنى ينفراقۇرىلىم دامىماعان، بالالار توزىعى جەتكەن عيماراتتاردا وقۋعا ءماجبۇر. مەكتەپ جەتىسپەۋشىلىگى سالدارىنان ءار سىنىپتا 130-دان استام بالا ءبىلىم الادى. ءبىراق ولاردىڭ كوبى باستاۋىشتان كەيىن ءبىلىمىن جالعاستىرمايدى. ويتكەنى قىزمەت قۇنى تىم قىمبات، بۇل كوپ وتباسىنىڭ مۇمكىندىگىن شەكتەيدى. بۇل جاستاعى بالالاردىڭ %8- ءى عانا ورتا مەكتەپتى ءبىتىرىپ شىعادى.

بەلگياداعى ءبىلىم بەرۋ عيماراتتارىنا كۇردەلى جوندەۋ قاجەت

مەكتەپ عيماراتىنىڭ جەتىسپەۋشىلىگى ەۋروپا ەلدەرىندە دە وزەكتى. 2018 -جىلعى رەسمي مالىمەتكە سايكەس، بەلگيادا 3 مىڭعا جۋىق مەملەكەتتىك ءبىلىم بەرۋ ورىندارى تىركەلگەن. جىل سايىن دەموگرافيانىڭ ارتۋى ەسەپتى مەكتەپ تابالدىرىعىن اتتايتىن بالا سانى دا ەداۋىر ارتقان. ءبىراق ءبىلىم بەرۋ مەكەمەلەرىندە ورىن تاپشى. كەي عيماراتتار ەسكىرىپ، توزعان. كۇردەلى جوندەۋدى قاجەت ەتەدى. مەكتەپ تاپشىلىعى ماسەلەسى، اسىرەسە، بريۋسسەل مەن فلاندريادا قاتتى بايقالادى.

تاجىكستاندا مۇعالىم جەتىسپەيدى

تاجىكستان حالقىنىڭ كەيىنگى بىرنەشە جىلدا 10 ميلليون ادامعا ءوسۋى، مەكتەپتە بالا سانىنىڭ ارتۋىنا اكەلدى. بىلتىر جاڭا وقۋ جىلىندا 2,2 ميلليون وقۋشى مەكتەپ تابالدىرىعىن اتتاعان. ۇكىمەت جىل سايىن قۇرىلىستى ارتتىرىپ، ءبىلىم بەرۋ نىساندارىن قولدانىسقا بەرگەنىمەن، مەكتەپ ءالى دە تاپشى. وعان قوسا، مۇعالىم جەتىسپەيدى. ساراپشىلار پەداگوگ تاپشىلىعىن ەلدەگى ەكونوميكالىق توقىراۋعا بايلانىستى قالىپتاسقان ەميگراتسيامەن بايلانىستىرادى.

اۆتورى: ءاسيا نۇرلىبايەۆا