نيكول پاشينيان ازەربايجانمەن قارۋلى قاقتىعىسقا قاتىستى تۇسىنىكتەمە بەردى

استانا. KAZINFORM - ارمەنيا پرەمەر-ءمينيسترى نيكول پاشينياننىڭ توراعالىعىمەن ارمەنيا ۇكىمەتىنىڭ كەزەكتى وتىرىسى ءوتتى. پرەمەر-مينيستر ۇكىمەتتىڭ كۇن ءتارتىبىن تالقىلاماس بۇرىن ءسوز سويلەپ، جاقىندا شەكارادا بولعان قارۋلى قاقتىعىسقا توقتالدى.

بۇل تۋرالى ارمەنيا پرەمەر-ءمينيسترىنىڭ باسپا ءسوز قىزمەتى ءمالىم ەتتى.

پرەمەر-مينيستر نيكول پاشينيان بۇل وقيعانى ازەربايجاننىڭ سىندارلى ەمەس ساياساتىنىڭ تاعى ءبىر كورىنىسى دەپ اتادى.

«12-اقپاندا ازەربايجاندىق ب ا ق ارميان شەكاراشىلارى وق اتقاننان ازەربايجاندىق اسكەري قىزمەتكەر جاراقات العانى تۋرالى اقپارات تاراتقان. بۇل مالىمدەمەدەن كەيىن ارمەنيانىڭ اسكەري پوليتسياسى اتىستى توقتاتۋ رەجيمىن بۇزۋعا جول بەرمەۋ جانە ارانداتۋشىلىققا بوي الدىرماۋ تۋرالى قورعانىس ءمينيسترىنىڭ ناقتى بۇيرىعى بار بولعاندىقتان وقيعاعا قاتىستى تەرگەۋ باستالعانى تۋرالى مالىمدەمە جاسادى. وسىلايشا، بۇيرىقتى بۇزۋ فاكتىسى انىقتالعان جاعدايدا بۇل قۇقىقتىق سالدارعا اكەپ سوعادى. وسىعان قاراماستان، كەلەسى كۇنى تاڭەرتەڭ ازەربايجان ارميان پوزيتسيالارىنا جاپپاي وق جاۋدىرىپ، سالدارىنان ءتورت ادام قازا تاپتى»، - دەپ حابارلادى پرەمەر-مينيستر نيكول پاشينيان.

ونىڭ ايتۋىنشا، وقيعالاردى سيپاتتاۋ ازەربايجاننىڭ ارمەنيا رەسپۋبليكاسىنا قارسى اسكەري كۇشتەۋ ساياساتىن ۇستانۋ نيەتى وزگەرىسسىز قالعانىن تانىتىپ وتىر.

«ءبىزدىڭ اسەرىمىزشە، ازەربايجان ترانسشەكارالىق تۇراقتىلىق پەن قاۋىپسىزدىكتى قامتاماسىز ەتۋ ماسەلەسىنە ەشقانداي قىزىعۋشىلىق تانىتپايدى. ماسەلەن، 2022-جىلى شەكارا قاۋىپسىزدىگىن قامتاماسىز ەتۋ ماسەلەلەرى دە شەكارانى مەجەلەۋ كوميسسيالارىنىڭ مانداتىنا ەنگىزۋ كەرەك دەپ كەلىسىلگەن. وسى كەلىسىمگە سايكەس، ارمەنيا رەسپۋبليكاسى كوميسسيالار كەلىسىمگە سايكەس سونىڭ ىشىندە شەكارا قاۋىپسىزدىگىنە قاتىستى ماسەلەلەر بويىنشا جۇمىس ىستەيدى دەپ شامالاپ، ارمەنيا مەن ازەربايجان اراسىنداعى مەملەكەتتىك شەكارانى مەجەلەۋ جانە شەكارا قاۋىپسىزدىگى ماسەلەلەرى بويىنشا كوميسسيا قۇردى. ال ازەربايجان كەلىسىمدەرگە قايشى، قاۋىپسىزدىك قۇرامداس بولىگىن قوسپاعاندا، ءوز كوميسسياسىن ازەربايجان مەن ارمەنيا اراسىنداعى مەملەكەتتىك شەكارانى مەجەلەۋ جونىندەگى مەملەكەتتىك كوميسسيا دەپ اتادى»، - دەپ باسا ايتتى ارمەنيا مينيسترلەر كابينەتىنىڭ باسشىسى.

ن. پاشينياننىڭ ايتۋىنشا، ارمەنيانىڭ بۇل ماسەلەگە قاتىستى ۇستانىمى كەلەسىدەي: ارمەنيا مەن ازەربايجان اراسىنداعى شەكارانى كارتادا جانە جەردە جاڭعىرتىپ، ەكى جاقتىڭ اسكەرىن شەكاراعا شىعارۋ كەرەك. وسىلايشا، ەگەر شەكارالاردى قايتا شىعارعاننان كەيىن، اسكەرلەر شەكارانىڭ تەرىس جاعىندا ەكەنى انىقتالسا، ەكى جاق تا اسكەرلەرىن مەجەلەۋ سىزىعىنان تىس شىعارۋى كەرەك. نيكول پاشينيان ارمەنيانىڭ وسى ماسەلە بويىنشا كەلىسىلگەن قاعيداتتار نەگىزىندە ناقتى شەشىمدەر قابىلداۋعا دايىن ەكەنىن تاعى دا قۋاتتادى.

«قانداي پرينتسيپتەر تۋرالى ايتىپ وتىرمىز؟ 1991-جىلعى الماتى دەكلاراتسياسىنىڭ نەگىزىندە ارمەنيا مەن ازەربايجان ءبىر-ءبىرىنىڭ اۋماقتىق تۇتاستىعىن مويىندايتىنى تۋرالى حالىقارالىق پلاتفورمالاردا جاريالانعان جازباشا كەلىسىمدەر. الماتى دەكلاراتسياسى شەكارانى مەجەلەۋ پروتسەسىنىڭ ساياسي نەگىزىنە اينالۋى ءتيىس. بۇل دەگەنىمىز، ءبىز نەگىزىنەن تەحنيكالىق جۇمىستاردى اتقارۋىمىز كەرەك: 1991-جىلعى جاعداي بويىنشا ارميان ك س ر مەن ازەربايجان ك س ر اراسىنداعى دە-يۋرە شەكارالاردى كارتالاردا جانە جەردە جاڭعىرتۋ. شەكارانى دەليميتاتسيالاۋدىڭ ەكى نۇسقاسى بار. بىرىنشىدەن: ءبىز بۇكىل شەكارانى مەجەلەپ جاتىرمىز. ەكىنشىدەن: شەكارانى بولىكتەرگە ءبولىپ، شەكارانى بولىكتەرگە مەجەلەي باستايمىز. جوعارىدا اتالعان قاعيدالار اياسىندا ەكى نۇسقا دا بىزگە قولايلى. ءبىراق بىزگە ازەربايجان دا بۇل نۇسقادان قاشقاقتايتىن سياقتى كورىنەدى. ءبىزدىڭ تالداۋىمىز كورسەتكەندەي، مۇنىڭ ءبىر سەبەبى بار، مىسالى، ارمەنيا رەسپۋبليكاسىنا قارسى كەڭ اۋقىمدى سوعىس باستاۋ مۇمكىندىگىمەن شەكارانىڭ كەز كەلگەن بولىگىندە اسكەري وپەراتسيانى باستاۋ»، - دەدى ن. پاشينيان.

ارمەنيا مەن ءازىربايجان اراسىنداعى شەكارا مەجەلەنگەن جوق. 2022-جىلى تاراپتار شەكارانى مەجەلەۋ ماسەلەلەرى بويىنشا كوميسسيالار قۇردى. كوميسسيا ءتوراعالارىنىڭ - ەكى ەلدىڭ پرەمەر-مينيسترلەرىنىڭ ورىنباسارلارىنىڭ سوڭعى ەكى كەزدەسۋى (بارلىعى التى كەزدەسۋ ءوتتى) 2023 -جىلدىڭ قاراشاسىندا جانە 2024 -جىلدىڭ قاڭتارىندا ەكى ەل شەكاراسىندا ءوتتى. شەكارانى مەجەلەۋ ماسەلەلەرىن شەشۋمەن قاتار، ەلدەر اراسىندا شەشىلمەگەن انكلاۆتار/ەكسكلاۆتار ماسەلەسى دە بار.

اۆتور

زارينا تۋعانبايەۆا