نيۋ-يوركتە دونالد ترامپقا قاتىستى تاعى ءبىر سوت باستالدى

استانا. KAZINFORM - نيۋ-يوركتە ا ق ش- تىڭ بۇرىنعى پرەزيدەنتى دونالد ترامپتىڭ پورنوجۇلدىز ستورمي دەنيەلسكە 130 مىڭ دوللار تولەۋ ءىسى بويىنشا سوت پروتسەسى باستالدى. ترامپ - ا ق ش تاريحىندا قىلمىستىق جاۋاپكەرشىلىككە تارتىلعان العاشقى پرەزيدەنت، دەپ حابارلايدى ВВС.

ءبىر ايدان استام ۋاقىتقا سوزىلۋى مۇمكىن سوت پروتسەسى القابيلەردى تاڭداۋدان باستالدى.

العاشقى بىرنەشە مينۋتتا ۇمىتكەرلەردىڭ جارتىسىنا جۋىعى (96-نىڭ 50- ءى) ءادىل ءارى بەيتاراپ بولا المايتىنىن ايتىپ، پروتسەستەن شىعارىلدى.

القابي بولۋى مۇمكىن قالعاندارىنا ءارتۇرلى سۇراقتار قويىلدى، سونىڭ ىشىندە ولاردىڭ جاڭالىقتار مەن كىتاپ وقۋ ادەتتەرىنە قاتىستى سۇراقتار دا بولدى.

بارلىعى 12 ادامدى تاڭداۋ كەرەك (پليۋس التى قوسىمشا ادام).

ترامپ شامامەن جەتى ساعاتقا سوزىلعان سوت وتىرىسىنان كەيىن سۋديا حۋان مەرچاندى تاعى دا سىنعا الدى.

سوت وتىرىسىنىڭ باسىندا مەرچان قورعاۋشىنىڭ وزىنەن باس تارتۋ تۋرالى ءوتىنىشىن قابىلدامادى، بۇل جاعداي وسىمەن ەكىنشى رەت بولىپ وتىر.

ترامپتىڭ ادۆوكاتتارى ونىڭ قىزىنىڭ دەموكراتيالىق كليەنتتەرمەن ساياسي كونسالتينگتىك فيرمادا جۇمىس ىستەۋى مۇددەلەر قاقتىعىسىن تۋدىرادى دەپ مەرچاندى ءىستى قاراۋدان باس تارتۋعا شاقىردى.

ترامپ پورنواكتريسا ستورمي دەنيەلسكە ءوزى جەڭگەن 2016 -جىلعى پرەزيدەنتتىك سايلاۋ الدىندا 130 مىڭ دوللار تولەگەنىن جاسىرعىسى كەلدى دەپ ايىپتالۋدا.

تولەم جاساۋ فاكتىسى - زاڭبۇزۋشىلىق ەمەس. دەگەنمەن، ترامپ ادۆوكاتىنىڭ اقشاسىن وتەگەن كەزدە بۇل سوت شىعىندارى رەتىندە راسىمدەلگەن.

نيۋ-يورك شتاتىنىڭ پروكۋراتۋراسى بۇل ارەكەتتى ترامپتىڭ قارجىلىق قۇجاتتاردى قولدان جاساۋى نەمەسە بۇرمالاۋى دەپ ساناۋعا بولاتىنىن، بۇل ءوز كەزەگىندە قىلمىس رەتىندە جىكتەلۋى مۇمكىن دەپ سانايدى.

اۆتور

زارينا تۋعانبايەۆا