نيۋ-يوركتە بىرىككەن ۇلتتار ۇيىمى باس اسسامبلەياسىنىڭ 79- سەسسياسى اشىلادى
استانا. قازاقپارات – 10-قىركۇيەك كۇنى نيۋ-يوركتە بىرىككەن ۇلتتار ۇيىمى باس اسسامبلەياسىنىڭ 79- سەسسياسى اشىلادى. بۇل تۋرالى ب ۇ ۇ باسپا ءسوز قىزمەتى حابار تاراتتى.
سەسسيانىڭ نەگىزگى تاقىرىبى - «بەيبىتشىلىك، ورنىقتى دامۋ جانە ادامي قادىر-قاسيەت جولىنداعى بىرلىك پەن ارتۇرلىلىك بارلىق جەردە جانە بارلىعى ءۇشىن بىردەي».
باس اسسامبلەيانىڭ 79-سەسسياسىنىڭ ءتوراعاسى بولىپ كامەرۋننىڭ بۇرىنعى پرەمەر-ءمينيسترى فيلەمون يانگ سايلاندى. سايلاۋ ب ۇ ۇ- نىڭ نيۋ-يوركتەگى شتاب- پاتەرىندە 2024 -جىلدىڭ 6 -ماۋسىمىندا ءوتتى.
كۇن تارتىبىنە سايكەس، سەسسيانى باس اسسامبلەيا ءتوراعاسى اشقاننان كەيىن ءبىر مينۋت ۇنسىزدىك جاريالانادى.
سودان كەيىن سەسسيا جۇمىسى باس اسسامبلەيا ءتوراعاسىنىڭ ورىنباسارلارى مەن لاۋازىمدى تۇلعالاردى باس كوميتەتتەرگە سايلاۋ جونىندەگى ۇيىمداستىرۋ ماسەلەلەرىنە باعىتتالاتىن بولادى.
سونداي-اق كۇن ءتارتىبىن بەكىتۋ جانە جالپى جارىسسوزدەر وتكىزۋ جوسپارلانعان.
سەسسيا بارىسىندا ءبىرقاتار تاقىرىپتار بويىنشا جۇمىس جۇرگىزىلەدى: تۇراقتى ەكونوميكالىق ءوسىم مەن تۇراقتى دامۋعا جاردەمدەسۋ، حالىقارالىق بەيبىتشىلىك پەن قاۋىپسىزدىكتى قولداۋ، افريكانىڭ دامۋى، ادام قۇقىقتارىن ىلگەرىلەتۋ، گۋمانيتارلىق كومەك كورسەتۋ بويىنشا كۇش- جىگەردى ءتيىمدى ۇيلەستىرۋ، ادىلەتتىلىكتى جانە حالىقارالىق قۇقىق نورمالارىن ساقتاۋدى ىنتالاندىرۋ، قارۋسىزدانۋ، ەسىرتكىگە باقىلاۋ، قىلمىستىڭ الدىن الۋ جانە حالىقارالىق تەرروريزمگە قارسى كۇرەس، سونداي- اق ۇيىمداستىرۋشىلىق، اكىمشىلىك جانە باسقا دا ماسەلەلەر.
بۇعان دەيىن قازاقپارات ب ۇ ۇ باس حاتشىسى انتونيۋ گۋتەرريشتىڭ بولاشاق سامميتى تۋرالى ماقالاسىن جاريالاعان بولاتىن.
اۆتور
ەركەجان سماعۇلوۆا
