NVIDIA باسشىسىنىڭ قازاقستانعا ساپارى الەمدىك ب ا ق نازارىن اۋداردى

اتاپ ايتقاندا، امەريكالىق CNBC جانە Yahoo Finance باسىلىمدارى ەسەپتەۋ قۋاتتارىن ارتتىرۋعا باعىتتالعان اۋقىمدى جوبالارعا، سونىڭ ىشىندە ەكىباستۇزداعى Data Center Valley جوباسىنا توقتالدى. ال گونكونگتە شىعاتىن South China Morning Post باسىلىمى قازاقستاننىڭ ەنەرگەتيكالىق رەسۋرستارىن جاساندى ينتەللەكت يندۋسترياسىن دامىتۋداعى ارتىقشىلىقتارىنىڭ ءبىرى رەتىندە اتادى. ماقالادا دجەنسەن حۋانگتىڭ ەنەرگيانى ەكسپورتتاپ قانا قويماي، ونى ينتەللەكتۋالدىق ونىمدەر مەن ەسەپتەۋ قۋاتتارىن دامىتۋعا پايدالانۋ ماڭىزدى ەكەنى تۋرالى پىكىرى كەلتىرىلگەن.

NVIDIA باسشىسى ىقتيمال ەكونوميكالىق مۇمكىندىكتەردىڭ اۋقىمى تۋرالى دا ايتتى. ونىڭ باعالاۋىنشا، قۋاتى 5 گيگاۆاتت بولاتىن ەسەپتەۋ كلاستەرىن قۇرۋ 250 ميلليارد دوللارعا دەيىن ينۆەستيتسيا تارتۋعا جانە 1 تريلليون دوللار كولەمىندە ەكونوميكالىق ناتيجە بەرۋگە مۇمكىندىك بەرەدى.

الايدا دجەنسەن حۋانگتىڭ Silk Way تەلەارناسىنا بەرگەن تۇسىنىكتەمەسىنە سۇيەنسەك، بۇل الەۋەتتى ىسكە اسىرۋ ءۇشىن ەسەپتەۋ قۋاتتارىن قۇرۋ جەتكىلىكسىز. قازاقستان ەنەرگەتيكالىق ينفراقۇرىلىمدى دامىتۋى، دەرەكتەردى وڭدەۋ ورتالىقتارىنىڭ قۇرىلىسىن جەدەلدەتۋى، NVIDIA تەحنولوگيالارىن ەنگىزۋى جانە ءوز ماماندارىن دايارلاۋى قاجەت.

كومپانيا باسشىسى ءبىلىم بەرۋ سالاسىنا ەرەكشە ءمان بەرەدى. ونىڭ پىكىرىنشە، بۇل باعىت ەلگە كۇردەلى تەحنولوگيالىق جۇيەلەردى باسقارا الاتىن ينجەنەرلەر مەن مامانداردىڭ جاڭا بۋىنىن دايارلاۋعا مۇمكىندىك بەرەدى.

قازاقستانعا حالىقارالىق نازاردىڭ ارتۋى دەرەكتەردى وڭدەۋ ورتالىقتارىن سالۋ جوسپارلارىمەن عانا بايلانىستى ەمەس. ەلدىڭ تەحنولوگيالىق بيزنەسىنە سالىنعان ينۆەستيتسيالار دا شەتەلدىك باسىلىمداردىڭ نازارىن اۋداردى.

Bloomberg پەن Variety باسىلىمدارى NVIDIA مەن TCV ينۆەستيتسيالىق كومپانياسىنىڭ جاساندى ينتەللەكت كومەگىمەن ۆيدەو جاساۋعا ماماندانعان Higgsfield ستارتاپىنا ينۆەستيتسيا سالعانىن حابارلادى. كومپانيانىڭ قازاقستانمەن بايلانىسى بار، ال ينجەنەرلىك توبىنىڭ ەداۋىر بولىگى قازاقستاندا جۇمىس ىستەيدى.

وسىلايشا، حالىقارالىق اقپارات كەڭىستىگىندە قازاقستان جاساندى ينتەللەكت ينفراقۇرىلىمىن دامىتۋعا ارنالعان ءىرى جوبالاردىڭ الاڭى رەتىندە عانا ەمەس، سونىمەن قاتار ءوز تەحنولوگيالىق كوماندالارى مەن جوبالارى قالىپتاسىپ جاتقان ەل رەتىندە دە تانىلدى. بۇل باستامالاردىڭ ەكونوميكالىق ناتيجەسى ينۆەستيتسيانى، قولجەتىمدى ەنەرگيا رەسۋرستارىن، ينفراقۇرىلىمدى دامىتۋ مەن بىلىكتى ماماندار دايارلاۋدى قانشالىقتى ءتيىمدى ۇشتاستىرۋعا بايلانىستى بولادى.

بۇگىن قازاقستان پرەزيدەنتى قاسىم-جومارت توقايەۆ X الەۋمەتتىك جەلىسىندەگى پاراقشاسىندا NVIDIA باسشىسىنىڭ ۇسىنىستارىنىڭ پراكتيكالىق ماڭىزىن اتاپ وتكەن جازباسىن جاريالادى.

***

دجەنسەن حۋانگ ( Jensen Huang ) — امەريكاندىق تانىمال كاسىپكەر، ونەرتاپقىش جانە الەمدەگى ەڭ ءىرى تەحنولوگيالىق كومپانيالاردىڭ ءبىرى — NVIDIA كومپانياسىنىڭ نەگىزىن قالاۋشى ءارى باس ديرەكتورى (CEO).

ول قازىرگى تاڭدا جاساندى ينتەللەكت (AI) جانە كومپيۋتەرلىك گرافيكا سالاسىنىڭ ەڭ ىقپالدى تۇلعالارىنىڭ ءبىرى بولىپ تابىلادى.

ول 1963 -جىلى تايۆاندا تۋعان، بالالىق شاعىندا وتباسىمەن ا ق ش- قا قونىس اۋدارعان.  1993 -جىلى دجەنسەن حۋانگ سەرىكتەستەرىمەن بىرگە NVIDIA كومپانياسىن قۇردى. باستاپقىدا كومپانيا ۆيدەو ويىندارعا ارنالعان بەينەكارتالار (GPU) شىعارۋمەن اينالىستى.  ونىڭ باسشىلىعىمەن NVIDIA تەك ويىن سالاسىندا ەمەس، جاساندى ينتەللەكت، سۋپەركومپيۋتەرلەر، كريپتوگرافيا جانە اۆتوپيلوت جۇيەلەرىنە ارنالعان چيپتەر شىعاراتىن الەمدىك كوشباسشىعا اينالدى.

دجەنسەن حۋانگ كوپشىلىك الدىندا ءاردايىم ءوزىنىڭ برەندىنە اينالعان قارا بىلعارى كۇرتەشە (كوجانايا كۋرتكا) كيىپ شىعۋىمەن دە تانىمال.