پەنتاگون باسشىسى للويد وستين قاتەرلى دەرتكە شالدىقتى

رەسپۋبليكاشىلار يمپيچمەنت جاريالاۋدى تالاپ ەتىپ وتىرعان ا ق ش قورعانىس ءمينيسترى للويد وستيننەن قۋىقاستى بەزى قاتەرلى ىسىگى انىقتىلدى.

Kazinform بۇل تۋرالى NBC News-كە سىلتەمە جاساپ حابارلايدى.

پەنتاگوننىڭ باسپا ءسوز حاتشىسى گەنەرال- مايور پەت رايدەر 70 جاستاعى للويد وستين 22-جەلتوقساندا جاسالعان حيرۋرگيالىق وتادان كەيىن دەرتى اسقىنىپ ۋولتەر ريدتىڭ ۇلتتىق اسكەري مەديتسينالىق ورتالىعىنا 1-قاڭتاردا جاتقىزىلعانىن حابارلادى.

باستاپقى تەكسەرۋدە للويد وستيننىڭ ءزار شىعارۋ جولدارىندا ينفەكسيا بار ەكەنى انىقتالدى جانە 2-قاڭتاردا ونى مۇقيات باقىلاۋ جانە دۇرىس كۇتىم جاساۋ ءۇشىن قارقىندى تەراپيا بولىمىنە اۋىستىرۋ تۋرالى شەشىم قابىلداندى.

وتكەن ايدا ودان پروستاتا سكرينينگى كەزىندە ادەتتەگى زەرتحانالىق تالداۋ الىنىپ قۋىقاستى وبىرى دياگنوزى قويىلدى.

رەسمي تۇلعالار سەيسەنبى كۇنى للويد وستيننىڭ ينفەكسياسى جويىلعانىن جانە ول جازىلىپ كەلە جاتقانىن ايتتى، ءبىراق قالپىنا كەلۋ ءۇشىن ۋاقىت قاجەت. اسكەري ءبولىم وكىلدەرىنىڭ ايتۋىنشا، للويد وستين بۇكىل الەمنىڭ قورعانىس مينيسترلىكتەرىنىڭ جۇمىسىن قاداعالاپ وتىرۋ جۇمىسىن جالعاستىرىپ جاتىر جانە ءوز مىندەتىن بەلسەندى اتقارىپ ءجۇر.

للويد وستيننىڭ اۋرۋحاناعا جاتقىزىلعانى تۋرالى اقپاراتتى اق ءۇي مەن قورعانىس مينيسترلىگىنىڭ نەگىزگى تۇلعالارىنا حابارلاۋ ءۇشىن قورعانىس مينيسترلىگىنە ءۇش كۇن قاجەت بولعان. اكىمشىلىكتىڭ جوعارى شەندى مۇشەلەرىن ۇزاق ۋاقىت حاباردار ەتپەگەنىن قارۋلى كۇشتەر باسشىسى سىنعا الدى. وكىلدەر پالاتاسىنىڭ رەسپۋبليكاشىسى مەتت روزەندەيل ءتىپتى للويد وستينگە قارسى يمپيچمەنت ماسەلەسىن باستاۋعا نيەتتى.

پەنتاگون زاڭگەرلەرى ا ق ش پەن كونگرەسس باسشىلارىنا ەسكەرتىلمەۋى قانداي دا ءبىر زاڭ بۇزۋشىلىققا جاتا ما، جوق پا - تەكسەرەدى.

پالاتانىڭ قارۋلى كۇشتەر كوميتەتىنىڭ ءتوراعاسى مايك رودجەرس (الاباما شتاتى) سەيسەنبىدە للويد وستيننىڭ اۋرۋحاناعا جاتقىزىلعانى اشىق ايتىلماعانىنا قاتىستى رەسمي تەرگەۋ جاريالادى.

قۋىقاستى بەزىنىڭ قاتەرلى ىسىگى امەريكالىق ەرلەر اراسىندا ەڭ كوپ تاراعان ىسىك ءتۇرى، وعان ءاربىر 8 ەر ادامنىڭ 1-ەۋى جانە ءاربىر 6 افروامەريكالىقتىڭ دا 1-ەۋى شالدىعادى.

اۆتور

بالنۇر قوجاگەلدى