نەتانياحۋ: يزرايل جالاڭ قولمەن دە سوعىسۋعا دايىن

استانا. KAZINFORM – ا ق ش يزرايلگە ەگەر رافاحتا ۇلكەن وپەراتسيا باستاسا، وق-ءدارى جەتكىزۋدى توقتاتامىز دەپ قورقىتقاننان كەيىن يزرايل پرەمەر-ءمينيسترى بينيامين نەتانياحۋ يزرايل ءتىپتى جالاڭ قولمەن دە (نەتانياحۋ «تىرناقپەن» دەدى) سوعىسۋعا دايىن ەكەنىن مالىمدەدى، دەپ حابارلايدى ВВС.

«ەگەر جالعىز كۇرەسۋ كەرەك بولسا، ءبىز جالعىز كۇرەسەمىز. مەن بۇعان دەيىن دە ايتتىم، ەگەر قاجەت بولسا، ءبىز تىرناقپەن دە كۇرەسەمىز... ءبىراق بىزدە تىرناقتان دا كوپ نارسە بار جانە ءبىز تاباندىلىعىمىز جانە قۇدايدىڭ كومەگىمەن جەڭەمىز» ، - دەدى نەتانياحۋ بەيسەنبى كۇنى بەينەۇندەۋىندە.

اقش پرەزيدەنتى دجو بايدەن سارسەنبى كۇنى تەلەديدارعا بەرگەن سۇحباتىندا ا ق ش رافاحتا پالەستينالىق بەيبىت تۇرعىندار اراسىندا كوپتەگەن شىعىنعا ۇشىراعان وپەراتسيانى باستاسا، يزرايلگە قارۋ-جاراق پەن وق- ءدارى جەتكىزۋدى توقتاتاتىنىن ايتتى.

بۇعان دەيىن ا ق ش ەسكەرتۋ رەتىندە يزرايلگە اۋە بومبالارىنىڭ تاعى ءبىر پارتياسىن جەتكىزۋدەن باس تارتقان بولاتىن.

نەتانياحۋ بۇل تۋرالى بەينەۇندەۋىندە تىكەلەي ايتقان جوق، ءبىراق ونىڭ سويلەگەن ءسوزىنىڭ مازمۇنى امەريكاندىقتارعا جاۋاپ بولعانى انىق.

ول ءوز سوزىندە 1948-جىلعى سوعىستى ەسكە الدى.

«بۇدان 76 جىل بۇرىن تاۋەلسىزدىك ءۇشىن سوعىستا بىزدەر از، جاۋ كوپ ەدى. بىزدە قارۋ بولعان جوق. يزرايل قارۋ ەمبارگوسىنىڭ استىندا بولدى. ءبىراق ارامىزداعى وراسان زور قايراتتىڭ، قاھارماندىق پەن بىرلىكتىڭ ارقاسىندا ءبىز جەڭىسكە جەتتىك»، - دەدى پرەمەر.

ب ۇ ۇ شەنەۋنىكتەرى بەيسەنبى كۇنى يزرايل بەيبىت تۇرعىندارعا رافاحتى ەۆاكۋاتسيالاۋعا بۇيرىق بەرگەن دۇيسەنبىدەن بەرى 80 مىڭنان استام ادام قاشىپ كەتكەنىن حابارلادى.

يزرايل ۇشاقتارى اپتا بويى رافاحقا نىسانالى سوققىلار جاساپ جاتىر.

ەسكە سالا كەتسەك، بۇعان دەيىن ا ق ش پرەزيدەنتى دجو بايدەن ەگەر يزرايل رافاح قالاسىندا شابۋىل جاسايتىن بولسا، ولارعا سنارياد پەن وق-ءدارى بەرۋ توقتاتىلاتىنىن ءمالىم ەتكەن ەدى.

اۆتور

زارينا تۋعانبايەۆا