ۆەنەسۋەلا وپپوزيتسياسىنىڭ جەتەكشىسى قاماۋعا الىنعاننان كەيىن بوساتىلدى

استانا. KAZINFORM - ماريا كورينا ماچادو ۆەنەسۋەلا استاناسى كاراكاستىڭ شىعىسىنداعى نارازىلىق اكتسياسىنان شىعىپ بارا جاتقانىندا، اتىس كەزىندە ۇستالدى، دەپ حابارلايدى Kazinform اگەنتتىگى Reuters-كە سىلتەمە جاساپ.

ۆەنەسۋەلا وپپوزيتسياسىنىڭ جەتەكشىسى ماريا كورينا ماچادو بەيسەنبىدە بوساتىلدى، دەپ حابارلادى ونىڭ Vente Venezuela قوزعالىسى.

جۇما كۇنى پرەزيدەنت نيكولاس مادۋرونى ءۇشىنشى ۇلىقتاۋ ءراسىمى الدىندا وعان قىسىم كورسەتۋ ماقساتىندا ەلدە وپپوزيتسيا شەرۋلەرى ءوتتى. ماچادو بىرنەشە اي ىشىندە العاش رەت كوپشىلىك الدىنا شىققاننان كەيىن ۇستالدى. ونىڭ وداقتاسى، پرەزيدەنتتىككە بۇرىنعى كانديدات ەدمۋندو گونسالەستى ونى دەرەۋ بوساتۋدى تالاپ ەتتى. كەيبىر ۇكىمەتتەر دە بۇل وقيعانى ايىپتادى، دەپ جازدى Reuters.

Vente Venezuela قوزعالىسى الەۋمەتتىك جەلىدە جاريالانعان مالىمدەمەدە حابارلاعانداي، ماچادو قاماۋعا الىنعان كەزدە بىرنەشە بەينە تۇسىرۋگە ءماجبۇر بولعان.

- مەن قازىر قاۋىپسىز جەردەمىن جانە بۇرىنعىدان دا بەرىكپىن، - دەپ جازدى ماچادو بوساتىلعاننان كەيىن X الەۋمەتتىك جەلىسىندە.

ول جۇما كۇنى نارازىلىق كەزىندە بولعان وقيعالار تۋرالى ەگجەي-تەگجەيلى بايانداۋعا ۋادە بەردى.

ۇكىمەت وكىلدەرى، ونىڭ ىشىندە ەلدىڭ ىشكى ىستەر ءمينيسترى ديوسدادو كابەلو ونىڭ ۇستالۋىن وپپوزيتسيا قوزعالىسىنا قولداۋ كورسەتۋ ءۇشىن ۇيىمداستىرىلعانىن مالىمدەدى.

وپپوزيتسيا دا، بيلىك پارتياسى دا وتكەن جىلعى پرەزيدەنتتىك سايلاۋدا جەڭىسكە جەتكەنىن مالىمدەپ وتىر.

ەلدىڭ سايلاۋ كوميسسياسى مەن جوعارعى سوتى شىلدەدە وتكەن داۋىس بەرۋدە مادۋرو جەڭگەنىن مالىمدەپ وتىر، ءبىراق قورىتىندىلار تۋرالى ازىرگە تولىق مالىمەت جوق.

زارينا تۋعانبايەۆا

اۆتور