نۇرلان نوعايەۆ مۇناي كومپانياسىنا جۇمىسقا ورنالاسۋ قالاي جۇزەگە اساتىنىن اتادى
اقتاۋ. KAZINFORM - جاڭاوزەن قالاسىنىڭ اكىمىن تاعايىنداۋدان كەيىن جۇمىسسىز ازاماتتارمەن كەزدەسكەن ماڭعىستاۋ وبلىسىنىڭ باسشىسى نۇرلان نوعايەۆ كوپشىلىكتىڭ ساۋالىنا جاۋاپ بەردى.
كەزدەسۋدە جاڭاوزەن تۇرعىندارى مۇناي-گاز سالاسىنا جۇمىسقا ورنالاسۋعا بايلانىستى سۇراقتار قويدى. وبلىس اكىمى جۇمىسپەن قامتۋ ماسەلەلەرى قولدانىستاعى زاڭنامادا بەلگىلەنگەن تارتىپپەن شەشىلەتىنىن اتادى.
«مۇناي-گاز سالاسىنا جۇمىسقا ورنالاسۋ ماسەلەلەرى اشىقتىق پەن ادىلدىك قاعيداتتارىنا نەگىزدەلە وتىرىپ شەشىلەتىن بولادى. ايماقتاعى حالىق سانى جىل وتكەن سايىن ارتىپ كەلەدى، ال جاڭا كاسىپورىنداردىڭ اشىلۋى ۋاقىتتى قاجەت ەتەدى. ايماقتا جاڭا جۇمىس ورىندارى قۇرىلۋدا، الداعى ۋاقىتتا دا قۇرىلادى. الايدا كەزەكتەن تىس جۇمىسقا ورنالاسۋ مۇمكىن ەمەس. اسىرەسە مۇناي نەمەسە سەرۆيستىك كومپانيالارعا. بۇل كەزەكتە تۇرعان باسقا ازاماتتارعا ادىلەتسىز بولادى. سونداي-اق، حالىقتى جۇمىسپەن قامتۋدى قامتاماسىز ەتۋ جانە كاسىپكەرلىكتى قولداۋدىڭ مەملەكەتتىك باعدارلامالارى شەڭبەرىندە، جەرگىلىكتى اتقارۋشى ورگاندار ۇسىناتىن باسقا دا جۇمىسقا ورنالاسۋ مۇمكىندىكتەرىن قاراستىرۋ قاجەت»، - دەدى نۇرلان نوعايەۆ.
بۇعان دەيىن نۇرلان نوعايەۆ جاڭاوزەن تۇرعىندارىمەن كەزدەسۋدە مۇنايدان باسقا سالادان دا جۇمىس قاراۋ كەرەكتىگىن اتاعان بولاتىن.
اۆتور
جانكەلدى قارجان
