نەكە بۇزىلعاندا مۇلىكتى ءبولىسۋدىڭ بىرنەشە جولى بار - زاڭگەر

استانا. قازاقپارات - نەكەلى ۋاقىتتا جينالعان مۇلىكتى اجىراسقاننان كەيىن ءبولىسۋدىڭ بىرنەشە جولى بار. بۇل تۋرالى BNews.kz تىلشىسىنە بەرگەن سۇحباتىندا «فەنيكس» زاڭ فيرماسىنىڭ ديرەكتورى تالعات مىلتىقبايەۆ مالىمدەدى.

«بىرىنشىدەن، مۇلىك ورتاق مەنشىك يەلەرىنىڭ زاڭدى راستالعان ءوزارا كەلىسىمىمەن بولىسكە ءتۇسۋى مۇمكىن.

ال كەلىسىمگە كەلمەگەن جاعدايدا ءىس سوتتا قارالادى.

نەكە كەزىندە جينالعان مۇلىك ەرلى-زايىپتىلاردىڭ ورتاق يەلىگى سانالادى. كۇيەۋى مەن ايەلىنىڭ ۇلەستەرى ءوزارا تەڭ بولىپ تابىلادى.

بۇندا كىمنىڭ كوپ اقشا تاپقانى ەسكەرىلمەيدى. ورتاق مۇلىككە ءۇي شارۋاسىمەن، بالالاردى باعۋمەن جانە ت.ب. اينالىسقان ايەل دە قۇقىلى»، - دەدى ت. مىلتىقبايەۆ.

زاڭگەر اتاپ وتكەندەي، نەكە كەزىندە نەمەسە نەكە بۇزىلعاننان كەيىن ەرلى-زايىپتىلاردىڭ ءبىرى مۇلىكتىڭ ورنالاسقان تۇرعىلىقتى مەكەنجايى بويىنشا سوتقا جۇگىنە الادى. بۇنداي جاعدايدا مەملەكەتتىك باج سالىعى باعالانعان مۇلىك قۇنىنىڭ %1 قۇرايدى.

تالاپ-ارىزبەن بىرگە بارلىق ورتاق مەنشىكتەگى مۇلىكتىڭ ءتىزىمى، ولاردىڭ باعاسى، قاجەت بولعان جاعدايدا مۇلىكتى باعالاۋ جونىندەگى اكتىسى قوسا بەرىلەدى. سوت مۇلىكتى ءبولۋ تۋرالى شەشىمدى تالاپ-ارىز بەرىلگەن كۇننەن باستاپ ەكى اي مەرزىمىندە شىعارادى.

«الايدا سوت اجىراسىپ وتىرعان ەرلى-زايىپتىلاردىڭ مۇلكىن كامەلەتكە تولماعان بالالاردى جانە زاڭمەن قاراستىرىلعان باسقا دا جاعدايلاردى ەسكەرىپ، ۇلەستەر تەڭدىگىنە قاراماي بولە الادى. اتاپ وتەتىنى نەكەگە وتىرعانعا دەيىن جيىلعان مۇلىك، سىيلىق نەمەسە مۇرا جانە تاعى باسقا وتەۋسىز كەلىسىمدەر بويىنشا الىنعان مۇلىك بولىسكە تۇسپەيدى»، - دەدى زاڭگەر.