ۇندىشە «قارا جورعا» ءبيى دۇنيەگە كەلدى

استانا. قازاقپارات- ەندى بولليۆۋد جۇلدىزدارى «قارا جورعاعا» بيلەي الادى. قۇرىلعانىنا 30 جىل تولىپ وتىرعان استاناداعى ءۇندى مادەنيەتى ورتالىعىندا وسىنداي تىڭ دۇنيە پايدا بولعان.

بۇل ورتالىق قازاقستانداعى ءۇندىستان ەلشىلىگى جانىنان اشىلىپ، شيرەك عاسىردان استام ۋاقىت جۇمىس ىستەپ تۇر.

بۇل - سۆامي ۆيۆەكاناندا اتىنداعى ءۇندى مادەنيەتى ورتالىعىنىڭ بي مۇعالىمى ۆيدياگاۋري حەمانت ادكار. قازاقتىڭ «قارا جورعاسىنا» ۇندىشە مىڭ بۇرالىپ بيلەپ ءجۇر. ءاننىڭ اۋەزى مەن ىرعاعىنا قىزىققان حورەوگراف ءوز ۇلتىنىڭ كلاسسيكالىق بيىنە قازاقشا بي قيمىلدارىن قوسقان. بىردە «قارا جورعانى» ەرتتەپ مىنسە، ەندى بىردە كوك مايساعا وتىرا قالىپ گۇل تەرەدى. مىڭ بوياۋلى ءۇندى مادەنيەتىنەن دە سىر شەرتەتىن ارەكەتتەردى بايقاۋعا بولادى. مۇنداي ەرەكشە قادامعا قازاقتىڭ قازىنالى ءتول ونەرى مەن حالىقتىڭ ىستىق ىقىلاسى سەبەپ بولعان دەيدى.

ۆيدياگاۋري حەمانت ادكار، بي مۇعالىمى:

- ونەردە ەكسپەريمەنتكە بارعان كەزدە ۇلكەن ىزدەنىس جاساۋ قاجەت. مىسالى، «قارا جورعانى» زەرتتەگەندە جەرگىلىكتى حالىق وسى بيدى قالاي جاقسى كورەتىنىن، ءان ءسوزىنىڭ ماعىناسىن، قيمىلدىڭ تاريحىن سۇراستىردىم. بيگە قاتىستى كوپتەگەن ۆيدەولار كوردىم. قازاق بيشىلەرىنەن ءبىراز دۇنيە ۇيرەندىم. قيمىل-ارەكەتتە ۇقساس جەرلەردى تابۋعا تىرىستىم. سوسىن ءوز مادەنيەتىممەن بايلانىستىرىپ، 1 ايدىڭ ىشىندە ۇندىشە «قارا جورعا» دۇنيەگە كەلدى. جاي عانا ءۇندى ءبيى ءبىر قاراعاندا قيىن بولىپ كورىنۋى مۇمكىن. ءبىراق ساحنا يەسىنىڭ ءتول مادەنيەتىمەن ورنەكتەلسە، كوپشىلىكتىڭ جۇرەگىنە جول تاباتىنىنا سەنىمدىمىن.

بۇل - ۆيدياگاۋري رەپەرتۋارىنداعى جالعىز قازاق ءبيى ەمەس. جاقىندا شاكىرتىمەن بىرگە «شاشۋ» بيىنە ۇندىشە ينتەرپرەتاتسيا جاساعان. 1934-جىلى «قىز جىبەك» وپەراسىندا العاش ورىندالعان ءبيدى ءۇندى قيمىلدارىمەن تاماشالاۋ، ۇيلەسىمى مەن ۇندەسۋىن قىزىقتاۋ كورەرمەن بولىپ تۇرعان ءبىزدى دە تاڭعالدىردى.

24.kz