ەندى مەملەكەتتىك ورگان پروكۋراتۋرانىڭ كەلىسىمىنسىز ينۆەستوردى تەكسەرە المايدى

استانا. قازاقپارات - 20- قاڭتاردان بەرى بىردە-ءبىر مەملەكەتتىك ورگان پروكۋروردىڭ كەلىسىمىنسىز ينۆەستورعا قاتىستى تەكسەرۋ تاعايىنداۋعا، اكىمشىلىك جاۋاپقا تارتۋعا، ليتسەنزياسىن قايتارىپ الۋعا قۇقىعى جوق.

بۇل تۋرالى ق ر باس پروكۋراتۋراسى قوعامدىق مۇددەلەردى قورعاۋ قىزمەتى باستىعىنىڭ ورىنباسارى ريزات سماعۇلوۆ مالىمدەدى.

- ينۆەستورلارعا قاتىستى مەملەكەتتىك ورگانداردىڭ نەگىزگى شەشىمدەرى بويىنشا «پروكۋرورلىق سۇزگى» ەنگىزىلدى. ول ەڭ الدىمەن ينۆەستورلاردى مەملەكەتتىك ورگانداردىڭ زاڭسىز شەشىمدەرىنەن، نەگىزسىز تەكسەرۋلەردەن، كەلىسىمشارتتاردى زاڭسىز ءبىرجاقتى بۇزۋدان جانە باسقا دا تىيىم سالۋ جانە شەكتەۋ شارالارىنان قورعاۋعا ارنالعان. ء بىر جىلدىڭ ىشىندە مەملەكەتتىك ورگانداردىڭ ينۆەستورلار ءۇشىن اۋىر زارداپتارعا اكەلەتىن بارلىق شەشىمدەرى پروكۋروردىڭ كەلىسىمىنەن كەيىن عانا قابىلداندى. بۇل مەحانيزم وڭ ناتيجەسىن كورسەتتى. پروكۋرورلار 700-دەن استام شەشىمدى كەلىسۋدەن باس تارتتى، سونىڭ ىشىندە ينۆەستورلارعا قاتىستى 310 تەكسەرۋ مەن 250 اكىمشىلىك ءوندىرىستىڭ جولىن كەستى، - دەدى ول و ك ق الاڭىندا.

سپيكەردىڭ ايتۋىنشا، ماسەلەنى قاراۋ كەزىندە پروكۋرور «زاڭنىڭ ءارىپىن» عانا ەمەس، اقىلعا قونىمدى كوزقاراستى باسشىلىققا الادى.

- مىسالى، جەر قويناۋىن پايدالانۋشىلاردىڭ بىرىنە مىندەتتەمەلەردىڭ تولىق ورىندالماۋىنا بايلانىستى كەلىسىمشارتتى ۇزارتۋدان باس تارتىلدى. الايدا، پروكۋراتۋرا مۇنداي شەشىمدى شىعارۋعا رۇقسات بەرگەن جوق، ويتكەنى 2020 -جىلدان باستاپ جەر قويناۋىن پايدالانۋشى جوباعا 10 ميلليارد تەڭگەدەن استام ينۆەستيتسيا سالدى جانە جۇمىستى توقتاۋسىز جۇرگىزىپ جاتتى. سوندىقتان وعان ءوز مىندەتتەمەلەرىن ورىنداۋعا ۋاقىت بەرۋگە بولادى دەپ شەشتىك، - دەيدى ريزات سماعۇلوۆ.

ونىڭ ايتۋىنشا «پروكۋرورلىق سۇزگىنىڭ» تيىمدىلىگىن بيزنەس-قاۋىمداستىق تا، پرەزيدەنت تە جوعارى باعالاپ، ول كاسىپكەرلىك، ازاماتتىق پروتسەستىك جانە اكىمشىلىك قۇقىق بۇزۋشىلىق تۋرالى كودەكستەردە بەكىتىلگەن.

- وسى جىلدىڭ 20-قاڭتارىنان باستاپ بىردە-ءبىر مەملەكەتتىك ورگان پروكۋروردىڭ كەلىسىمىنسىز ينۆەستورعا قاتىستى تەكسەرۋدى تاعايىنداۋعا، اكىمشىلىك جاۋاپتىلىققا تارتۋعا، ونىڭ قىزمەتىن توقتاتۋعا، ليتسەنزيانى قايتارىپ الۋعا، كەلىسىمشارتتاردى بۇزۋعا جانە تالاپ قويۋعا شارا قولدانا المايدى. قازىر وبلىستىق جانە رەسپۋبليكالىق پۋلدىڭ بارلىق ينۆەستيتسيالىق جوبالارى پروكۋرورلىق سۇزگىدەن وتەدى، - دەپ ءتۇيدى ءسوزىن باس پروكۋراتۋرا وكىلى.

ايتا كەتەيىك، ەلىمىزدە ينۆەستورلاردىڭ قۇقىعىن بۇزعان 140 لاۋازىمدى تۇلعا جازالاندى.

سونداي-اق ينۆەستورلاردى قولداۋدىڭ جاڭا تەتىكتەرى ازىرلەندى. اتاپ ايتقاندا «جاسىل ءدالىز» جۇيەسى مەن سيفرلىق پلاتفورما ىسكە قوسىلدى.

اۆتور

ەربول جانات