ەندى مەملەكەتتەن كومەك العان بانكتەر جاڭا ينۆەستورعا ساتىلىپ وتىرادى

استانا. KAZINFORM - قارجى نارىعىن رەتتەۋ جانە دامىتۋ اگەنتتىگىنىڭ ءتورايىمى ءمادينا ءابىلقاسىموۆا قارجىلاي قيىندىققا تاپ بولعان بانكتەردى بيۋدجەت ەسەبىنەن قالپىنا كەلتىرۋدىڭ جاڭا ەرەجەسىن تانىستىردى.

- زاڭ جوباسىندا تولەم قابىلەتى جوق بانكتەردىڭ جۇمىسىن رەتتەۋ تەتىگىن ەنگىزۋ كوزدەلىپ وتىر. قولدانىستاعى تاسىلدەن باستى ايىرماشىلىعى انتيداعدارىستىق رەجيمگە كوشۋدىڭ ناقتى جۇيەسى بار بولۋىندا. بۇل جۇيە بانكتىڭ قارجىلىق احۋالىنىڭ ناشارلاۋىنا قاراي بىرتىندەپ ەنگىزىلەدى. رەتتەۋ تەتىگى ءۇش انتيكريزيستىك رەجيمنەن تۇرادى. ءبىرىنشىسى - كۇشەيتىلگەن قاداعالاۋ. ەكىنشىسى - قارجىلىق ورنىقتىلىقتى قالپىنا كەلتىرۋ. ءۇشىنشىسى - تولەم قابىلەتى جوق بانكتىڭ جۇمىسىن رەتتەۋ، - دەدى ول.

ايتۋىنشا، بانكتەردى مەملەكەت تاراپىنان قولداۋعا تەك شەتىن جاعدايلاردا عانا، جۇيەقۇراۋشى بانكتەر ءۇشىن عانا، اكتسيونەرلىك كاپيتالدى تولىق پايدالانعان جاعدايدا جانە بۇكىل مىندەتتەمەلەردى تولىق كونۆەرتاتسيالاپ بولعاننان كەيىن عانا جول بەرىلەدى.

- مەملەكەتتىك قولداۋدىڭ جالعىز فورماسى بولادى - مەملەكەت جۇيەقۇراۋشى بانكتىڭ كاپيتالىنان تىكەلەي ۇلەس الادى. بۇل قارجى جۇيەسىنىڭ تۇراقتىلىعىن ساقتاۋ ءۇشىن كەرەك. مەملەكەتتىڭ ۇلەس الۋى ۋاقىتشا جانە قايتارىمدى نەگىزدە بولادى. قاجەت مولشەردىڭ ەڭ تومەنگى بولىگىندە عانا قولداۋ كورسەتىلەدى. ونىڭ ۇستىنە بانكتىڭ اكسيونەرلەرىن، باسشىلىعىن اۋىستىرۋ، ديۆيدەنتتەر مەن بونۋستار تولەۋگە تىيىم سالۋ سياقتى شارالارمەن بىرگە جۇرەدى.

قارجىلىق ورنىقتىلىق قالپىنا كەلگەن سوڭ بانك جاڭا ينۆەستورعا ساتىلادى. ال مەملەكەت سالعان اقشا بيۋدجەتكە قايتارىلادى، - دەدى ءمادينا ءابىلقاسىموۆا.

ايتا كەتەيىك، ءدال قازىر ۇلتتىق بانك پەن قارجى نارىعىن دامىتۋ جانە رەتتەۋ اگەنتتىگى ماجىلىستە بانكتەر تۋرالى زاڭ جوباسى تانىستىرىپ جاتىر.

اۆتور

ەسىمجان ناقتىباي