ەندى جايىلىمدى ەشكىم زاڭسىز يەمدەنبەيدى

استانا. KAZINFORM - بۇگىن سەناتورلار جايىلىمداردىڭ ءبىرىڭعاي تاپشىلىعى ماسەلەسىن شەشۋ نەگىزگى مىندەتى بولىپ تابىلاتىن زاڭدى ماقۇلدادى. بۇل تۋرالى ق ر پارلامەنتى سەناتىنىڭ باسپا ءسوز قىزمەتى حابارلادى.

دەپۋتاتتار وسى ماسەلەنى شەشۋ تۋرالى وزدەرى باستاما كوتەرگەن بولاتىن. ويتكەنى اۋىل تۇرعىندارى بۇل پروبلەمانى الدەنەشە جىلدان بەرى ايتىپ كەلەدى. سوندىقتان ول زاڭدى كەيىنگە قالدىرۋدىڭ ءجونى جوق ەدى.

دەپۋتاتتار بۇل جولى نە ۇسىنىپ وتىر؟ ونداعى كەيبىر جاڭالىقتار مىنەكەي:

- ەندى شالعايداعى مال شارۋاشىلىعى جايىلىمدارىن 5 جىل مەرزىمگە تەگىن يەمدەنۋگە ەشكىم مۇمكىندىك بەرمەيدى. سەناتورلار ىقتيمال سىبايلاس جەمقورلىقتىڭ وسى نورماسىن قولدانىستاعى زاڭنامادان الىپ تاستادى، سوندىقتان بۇل ولقىلىقتى كونكۋرستان تىس ەشكىم پايدالانا المايدى. ءسويتىپ، بۇل جەرلەردى وزگە اۋىل تۇرعىندارى قوعامدىق قاجەتتىلىككە پايدالانۋ مۇمكىندىگىنەن ايىرىلادى.

- سونىمەن قاتار، جايىلىمعا يەلىك ەتەتىندەر بۇل جەرلەردى كەم دەگەندە %50- عا پايدالانۋى كەرەك، ال بۇرىن %20 جەتكىلىكتى بولاتىن. ەگەر پايدالانعان جەرلەردە مال از بولسا، مەملەكەت ول جايىلىمدى جەر القابى جەتىسپەيتىن باسقا فەرمەرگە بەرە الادى.

- حالىقتىڭ مۇقتاجىنا ارنالعان جايىلىمداردى اۋىل شارۋاشىلىعى ماقساتىنداعى القاپتاردىڭ باسقا تۇرىنە اۋىستىرۋعا تىيىم سالىنادى.

- ەندى ورمان شارۋاشىلىقتارى اكىمدىكتەرگە جىل سايىن ادامدارعا ءشوپ شابۋعا جانە مال جايۋعا رۇقسات ەتىلگەن مەملەكەتتىك قور ۋچاسكەلەرى تۋرالى اقپارات بەرىپ وتىرۋى ءتيىس. بۇل ورمان قورى جەرلەرىندە ورنالاسقان جايىلىمداردى ۇتىمدى پايدالانۋعا مۇمكىندىك بەرەدى.

- «قوعامدىق جايىلىمدار» ۇعىمى ەنگىزىلەدى. بۇل ەلدى مەكەننىڭ اينالاسىنداعى اۋىل تۇرعىندارىنىڭ مال جايۋىنا ارنالعان جەرلەردىڭ مارتەبەسىن ناقتىلاۋ ءۇشىن ماڭىزدى.

«سوڭعى جىلدارى اۋىل تۇرعىندارى اراسىندا جايىلىمدىق جەرلەر ماسەلەسى ءجيى كوتەرىلىپ ءجۇر. وسى وزەكتى پروبلەمالاردى نازارعا الىپ، سەناتورلارىمىز ءبىرقاتار زاڭنامالىق وزگەرىستەرگە باستاماشىلىق جاسادى. اتاپ ايتقاندا، جايىلىمداردىڭ حالىققا قولجەتىمدىلىگىن قامتاماسىز ەتۋگە جانە ونى ۇتىمدى پايدالانۋعا ارنالعان جاڭا ەرەجەلەر توپتاماسى ماقۇلدانىپ وتىر. سونداي- اق جەردىڭ قۇنارلىعىن ساقتاۋدى كوزدەيتىن تىڭ تۇزەتۋلەر ەنگىزىلدى. قارالعان زاڭ جايىلىمداردى باسقارۋ، پايدالانۋ سالاسىنداعى مەملەكەتتىك ساياساتتى جەتىلدىرۋگە جانە ەلىمىزدە اۋىل شارۋاشىلىعىن دامىتۋعا ءوز ۇلەسىن قوسادى دەپ سەنەمىز»، - دەدى ماۋلەن اشىمبايەۆ.

اۆتور

باقىتگۇل اباي قىزى