نازاربايەۆتىڭ قۇداسىنا تيەسىلى قۇنى 66 ميلليون ا ق ش دوللارى بولاتىن مۇناي تەرمينالى مەملەكەت مەنشىگىنە قايتارىلدى
استانا. KAZINFORM - الماتى قالاسى پروكۋرورىنىڭ تالاپ-ارىزى بويىنشا اقتاۋ حالىقارالىق تەڭىز ساۋدا پورتىنىڭ اكۆاتورياسىندا ورنالاسقان، قۇنى 66 ميلليون ا ق ش دوللارى بولاتىن اۋدانى 134 گەكتار مۇناي تەرمينالى مەملەكەت مەنشىگىنە قايتارىلدى.
ءمالىم بولعانداي، تالاپ-ارىز اسقار قۇلىبايەۆقا تيەسىلى كومپانيانىڭ شەتەلدىك ينۆەستوردىڭ مەنشىگىن زاڭسىز الىپ قويۋى ناتيجەسىندە كەلتىرىلگەن زالالدى وتەۋ ماقساتىندا بەرىلگەن.
«2011 -جىلى مۇناي تەرمينالى قۇلىبايەۆ كومپانياسىنىڭ مەنشىگىنە الىنعان. 2024 -جىلدىڭ 26 -اقپانىندا ماڭعىستاۋ وبلىسى مامانداندىرىلعان اۋدانارالىق ەكونوميكالىق سوتىنىڭ شەشىمىمەن الماتى قالاسى پروكۋرورىنىڭ تالاپ-ارىزى قاناعاتتاندىرىلدى، مۇناي تەرمينالى مەملەكەت مەنشىگىنە قايتارىلدى، سوت اكتىسى زاڭدى كۇشىنە ەندى»، - دەلىنگەن حابارلامادا.
ەسكە سالا كەتەيىڭ، اسقار قۇلىبايەۆ- قازاقستاننىڭ ءبىرىنشى پرەزيدەنتى نۇرسۇلتان نازاربايەۆتىڭ قۇداسى، ونىڭ ورتانشى قىزى دينارا قۇلىبايەۆانىڭ قايىن اتاسى جانە ميللياردەر تيمۋر قۇلىبايەۆتىڭ اكەسى.
اۆتور
باقىتگۇل اباي قىزى
