نازاربايەۆ قورى بيلىكتىڭ سۋ تاسقىنىمەن كۇرەس شارالارىن قولدايتىنىن مالىمدەدى

استانا. قازاقپارات - نۇرسۇلتان نازاربايەۆ قورى بيلىكتىڭ سۋ تاسقىنىنىڭ سالدارىن جويۋ بويىنشا جۇرگىزگەن شارالارىن تۇتاس قولدايتىنىن مالىمدەدى.

16-ساۋىردە قور مالىمدەمە تاراتىپ، ەلدە سۋ تاسقىنى جالعاسىپ جاتقان شاقتا «نازاربايەۆ قورى بيلىكتىڭ بەدەلىن تۇسىرۋگە تالپىنىپ جاتىر» دەگەن تۇجىرىمدى جوققا شىعاردى.

قوردىڭ مالىمدەۋىنشە، بۇعان دەيىن «كەيبىر الەۋمەتتىك مەديادا» نۇرسۇلتان نازاربايەۆ قورى «بيلىكتىڭ بەدەلىن ءتۇسىرۋ جانە قوعامدى تۇراقسىزداندىرۋعا» باعىتتالعان اقپاراتتىق كامپانيانى جۇرگىزىپ جاتقانى جونىندە مالىمەت جاريالانعان.

قور وكىلدەرىنىڭ ايتىنشا، مالىمەتتى انونيمدى دەرەككوزى جاريالاعان جانە ونى جەكەلەگەن مەديا تۇلعالارى دا قايتالاپ، «نەگىزسىز جالا جاپقان».

«نۇرسۇلتان نازاربايەۆ قورى بۇل جاريالانىم مەن مالىمدەمەنىڭ ەشقانداي وبەكتيۆتى ءارى ناقتى نەگىزى جوق دەپ مالىمدەمە جاساۋ قاجەت دەپ سانايدى» دەپ جازىلعان حابارلامادا.

قور سونىمەن بىرگە «قوعامعا شىنايى جانە سەنىمدى اقپارات بەرۋدىڭ ماڭىزدىلىعىن» اتاپ كورسەتكەن.

«نۇرسۇلتان نازاربايەۆ قورىنىڭ قىزمەتىندە ساياسي دا، اقپاراتتىق- مانيپۋلياتسيالىق تا سيپات جوق. قوردىڭ جۇمىسى تەك الەۋمەتتىك جوبالار مەن ازاماتتىق باستامالاردى دامىتۋعا، جاستاردى قولداۋعا، قايىرىمدىلىق كومەك كورسەتۋگە باعىتتالعان» دەپ جازىلعان حابارلامادا.

قوردىڭ مالىمدەمەسىندە ەكس- پرەزيدەنتتىڭ ۇستانىمى دا جازىلعان.

«بۇعان قوسا، نۇرسۇلتان نازاربايەۆ مەملەكەت باسشىسى قاسىم-جومارت توقايەۆتى جانە ونىڭ ساياسي باعىتىن ءاردايىم قولداعانىن جانە قولدايتىنىن ايتامىز. وسى كۇندەرى ەل ازاماتتارى سياقتى تۇڭعىش پرەزيدەنت تە سۋ تاسقىنىنان زارداپ شەككەن جاندارعا الاڭداپ وتىر. ءبىز مەملەكەت باسشىسى مەن ۇكىمەتتىڭ ەل وڭىرلەرىندە بۇرىن-سوڭدى بولماعان سۋ تاسقىنىنىڭ سالدارىن جويۋ جونىندەگى شاراسىن تولىعىمەن قولدايمىز. » دەپ جازىلعان حابارلامادا.

مالىمدەمەنى بۇرىنعى پرەزيدەنتتىڭ باسپا ءسوز حاتشىسى ايدوس ۇكىباي X جەلىسىندەگى پاراقشاسىندا تاراتتى. پرەزيدەنتتىڭ ءوزى سۋ تاسقىنى احۋالىنا بايلانىستى پىكىر بىلدىرگەن جوق.

Elbasy.kz-تەن Nazarbayev.kz بولىپ وزگەرتىلگەن ەكس-پرەزيدەنتتىڭ رەسمي سايتى كەيىنگى كۇندەرى اشىلمايدى.

https://www.azattyq.org/a