نازاربايەۆ ۋنيۆەرسيتەتىندە ق ح ر ءتوراعاسى شي جينپيڭگە ەسكەرتكىش تاقتا ورناتىلدى
استانا. KAZINFORM - نازاربايەۆ ۋنيۆەرسيتەتىندە ق ح ر ءتوراعاسى شي جينپيڭگە ارنالعان ەسكەرتكىش تاقتا ورناتىلدى.
بۇگىن نازاربايەۆ ۋنيۆەرسيتەتىندە قىتاي حالىق رەسپۋبليكاسىنىڭ ءتوراعاسى شي جينپيڭ جاريالاعان «ءبىر بەلدەۋ، ءبىر جول» باستاماسىنىڭ 11 جىلدىعىنا ارنالعان ءىس-شارا ءوتتى.
ايتا كەتەيىك، 2013 -جىلى ءدال وسى ۋنيۆەرسيتەتتە شي جينپيڭ «ءبىر بەلدەۋ - ءبىر جول» اتتى اۋقىمدى ەكونوميكالىق باستامانى جاريالاعان بولاتىن. بۇل باستاما الەمدىك ساۋدا مەن ىنتىماقتاستىقتىڭ دامۋىنا ۇلكەن سەرپىن بەردى. ارادا 11 جىل ءوتىپ، وسى تاريحي وقيعانىڭ قۇرمەتىنە ۋنيۆەرسيتەت قابىرعاسىندا ەسكەرتكىش تاقتا ورناتىلدى.
ءىس-شاراعا قىتاي حالىق رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى جاڭ شياۋ، نازاربايەۆ ۋنيۆەرسيتەتىنىڭ پرورەكتورى يلەسانمي ادەسيدا، سونداي-اق ق ر سىرتقى ىستەر ءمينيسترىنىڭ وكىلى مەن باسقا دا قۇرمەتتى قوناقتار قاتىستى. يلەسانمي ادەسيدا ءوز سوزىندە قىتاي مەن قازاقستان اراسىنداعى بەرىك دوستىق پەن ىنتىماقتاستىقتى اتاپ ءوتتى. ول قىتاي ءتوراعاسى شي جينپيڭنىڭ 2013 -جىلى نازاربايەۆ ۋنيۆەرسيتەتىندە ەكونوميكالىق جانە ديپلوماتيالىق ىنتىماقتاستىق باستاماسىن جاريالاعانىن ەسكە سالدى.
«بۇل باستاما تەك ەكونوميكالىق جانە مادەني بايلانىستاردى نىعايتىپ قانا قويماي، سونداي-اق حالىقارالىق ىنتىماقتاستىقتى دامىتۋداعى ماڭىزدى سيمۆولعا اينالدى. بۇگىنگى شارا ەكى مەملەكەت اراسىنداعى ماڭگىلىك دوستىقتىڭ جانە ايماقتىق دامۋ مەن وركەندەۋدى بىرلەسە ىلگەرىلەتۋگە دەگەن ورتاق ۇمتىلىستىڭ بەلگىسى بولىپ سانالادى»، - دەدى يلەسانمي ادەسيدا.
ءوز كەزەگىندە قىتاي ەلشىسى جاڭ شياۋ قازاقستان مەن قىتايدىڭ وسى باستاما اياسىنداعى تىعىز ىنتىماقتاستىعىن جانە قول جەتكىزىلگەن جەتىستىكتەرىن اتاپ ءوتتى. ونىڭ ايتۋىنشا، ەكى ەل اراسىنداعى ساۋدا-ەكونوميكالىق بايلانىس قارقىندى دامىپ كەلە جاتىر.
«2023 -جىلى ەكى ەل اراسىنداعى تاۋار اينالىمى 41 ميلليارد ا ق ش دوللارىنا جەتكەن. قىتاي قازاقستاننىڭ ەڭ ءىرى ساۋدا سەرىكتەسى اتاندى. ال ساۋدا كولەمى بيىل قاڭتار-شىلدە ايلارىندا 70 پايىزعا وسكەن»، - دەپ اتاپ ءوتتى جان شياۋ.
سونىمەن قاتار ەلشى ەكى ەل اراسىنداعى كولىك، ەنەرگەتيكا جانە جوعارى تەحنولوگيالار سالالارىنداعى ىنتىماقتاستىقتى نىعايتۋ ماڭىزىن اتاپ ءوتتى جانە جاستاردىڭ بۇل پروتسەستەگى ءرولىن ەرەكشە اتادى.
«جاستار - ءبىزدىڭ بولاشاعىمىز. قازاقستان مەن قىتاي جاستارى ءبىزدىڭ دوستىق پەن ىنتىماقتاستىعىمىزدى نىعايتۋدا شەشۋشى ءرول اتقارادى. مەن سىزدەردى وسى ۇلى ىسكە بەلسەنە اتسالىسۋعا شاقىرامىن»، - دەدى جاڭ شياۋ.
ءىس- شارا سوڭىندا يلەسانمي ادەسيدا جانە جاڭ شياۋ بىرلەسىپ ەسكەرتكىش تاقتانى سالتاناتتى تۇردە اشتى.
اۆتور
دانا نۇرباقىت
