نازاربايەۆ ۋنيۆەرسيتەتىندە 73 ميلليارد تەڭگەنىڭ ءتيىمسىز يگەرىلگەنى انىقتالدى
استانا. KAZINFORM - جوعارى اۋديتورلىق پالاتانىڭ ءتوراعاسى ءاليحان سمايىلوۆ ءماجىلىس وتىرىسىنان كەيىنگى باسپا ءسوز ءماسليحاتىندا نازاربايەۆ ۋنيۆەرسيتەتىنىڭ جۇمىسىنا جۇرگىزىلگەن اۋديتتىڭ الدىن الا قورتىندىسىن ءمالىم ەتتى.
- ءبىرقاتار پروبلەما مەن كەمشىلىكتى انىقتادىق. ءبىرىنشىسى - نازاربايەۆ ۋنيۆەرسيتەتىنىڭ ءالى كۇنگە دەيىن بيۋدجەت قاراجاتىنا تاۋەلدى بولىپ كەلە جاتقانى. ال وقۋ ورنىن دامىتۋدىڭ ستراتەگيالىق قۇجاتىندا ۋنيۆەرسيتەت سىرتقى قاراجات كوزدەرىنىڭ ەسەبىنەن رەسپۋبليكالىق بيۋدجەت قارجىسىنا تاۋەلدىلىكتەن كەتۋ كەرەك بولعان. ۋنيۆەرسيەتكە بەرىلىپ وتىرعان تەڭدەسسىز مارتەبە مەن سالىق جەڭىلدىكتەرىنە، قولداۋ تەتىكتەرىنە قاراماستان قاراجاتىنىڭ 97 پايىزىن رەسپۋبليكالىق بيۋدجەتتەن الىپ وتىر. تاعى ءبىر كەمشىلىگى - قولدانىستاعى زاڭنامادا ۋنيۆەرسيتەتتىڭ قارجىلىق ەسەبىن جاريالاۋى قاراستىرىلماعان. بۇل ۋنيۆەرسيتەت جۇمىسىنىڭ اشىقتىعىنا كەدەرگى كەلتىرەدى، - دەدى ءاليحان سمايىلوۆ.
پالاتا باسشىسىنىڭ سوزىنشە ۋنيۆەرسيتەت مەملەكەت قاراجاتىن سونشالىقتى ءتيىمدى يگەرىپ وتىرعان جوق.
- اۋديت قورىتىندىسى بويىنشا ۋنيۆەرسيتەت 73 ميلليارد تەڭگەنى ءتيىمسىز جوسپارلاپ، يگەرگەنى انىقتالدى. سونداي-اق جارتى ميلليارد تەڭگەنىڭ قارجىلىق زاڭ بۇزۋ فاكتىسى بەلگىلى بولدى، - دەدى ءا. سمايىلوۆ.
ونىڭ سوزىنشە ۋنيۆەرسيتەتتىڭ ستراتەگيالىق سەرىكتەستەرىنىڭ تىزىمىندە تاۋارلار مەن قىزمەتتەر ۇسىناتىن كومپانيالاردىڭ ۇلەسى باسىم ەكەنى اشكەرە بولعان. بۇل تاۋارلار مەن قىزمەت جەتكىزۋشىلەردى كونكۋرسسىز-اق، ءبىر كوزدەن ساتىپ الۋ ارقىلى ىرىكتەۋگە جول اشقان.
اۋديت قورىتىندىسى ۋنيۆەرسيتەت باسشىلىعى مەن ۇكىمەتكە جولدانعان.
ەسىمجان ناقتىباي
اۆتور
