نازاربايەۆ ۋنيۆەرسيتەتى ايرىقشا مارتەبەسىنەن ايىرىلا ما - ساياسات نۇربەكتىڭ جاۋابى

نازاربايەۆ ۋنيۆەرسيتەتىندە ءبىلىم الۋ قۇنىنا قاتىستى بۇرمالاۋشىلىق كوبەيىپ تۇر. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ايتتى، دەپ حابارلايدى Kazinform.

«نازاربايەۆ ۋنيۆەرسيتەتىنىڭ مارتەبەسى «نازاربايەۆ ۋنيۆەرسيتەتى، نازاربايەۆ زياتكەرلىك مەكتەپتەرى جانە قورى مارتەبەسى تۋرالى» جەكە زاڭ ناقتى ايقىندالعان. سوندىقتان بىردەن ايتايىن، بۇل زاڭدى جويا المايمىز نەمەسە قانداي دا ءبىر وزگەرتۋ ەنگىزە المايمىز، ەنگىزبەيمىز دە. ءبىزدىڭ ماقساتىمىز - وسى ۋنيۆەرسيتەتتىڭ جالپى الەۋەتىن ساقتاۋ. بۇل تولىققاندى زەرتتەۋ ۋنيۆەرسيتەتتەرىنىڭ ءبىرى. قازىر ۋنيۆەرسيتەت توڭىرەگىندە وقۋ قۇنىنا قاتىستى وتە كوپ سپەكۋلياتسيا ءجۇرىپ جاتىر. ءىس جۇزىندە ونىڭ شىندىققا ساي ەمەستىگىنە سەندىرگىم كەلەدى»، - دەدى مينيستر ۇكىمەت وتىرىسىنان كەيىنگى بريفينگتە.

دەگەنمەن، ونىڭ ايتۋىنشا، ۋنيۆەرسيتەتتىڭ جوعارى قامقورشىلىق كەڭەسى جاساقتالدى. ونى پرەمەر- مينيستر باسقارادى.

«ۋنيۆەرسيتەتتىڭ قارجىلىق قۇرامداسىن ساۋىقتىرۋ، سونىمەن قاتار ونىڭ زەرتتەۋ الەۋەتىن كۇشەيتۋ بويىنشا ناقتى شارالار قابىلدانبادى. ويتكەنى، تاماشا بازاسى، ينفراقۇرىلىمى، زەرتحانالارى بار. ەندى ونى تولىققاندى پايدالانۋ قاجەت. سوندىقتان قانداي دا ءبىر تۇزەتۋ ءىس-ارەكەتتەرى بولادى. ءبىراق، ۋنيۆەرسيتەتتىڭ جالپى مارتەبەسى مەن باعىتىن وزگەرتەيىك دەپ وتىرعانىمىز جوق»، - دەدى ساياسات نۇربەك.

اۆتور

مارلان جيەمباي