ناتيجەسى جوق ىسپەن اينالىسۋ مۇلدەم بولماۋى قاجەت - پرەزيدەنت

- ۇكىمەتتىڭ الدىندا ۋاقىت وزدىرماي شەشەتىن ءبىرقاتار مىندەت بار. اتاپ ايتقاندا، تۇراقتى ءارى قالىپتى ينفلياتسيا كورسەتكىشىن جانە مەملەكەت قارجىسىنىڭ تەڭگەرىمدىلىگىن قامتاماسىز ەتۋ، سونداي-اق بىلتىرعى جولداۋىمدا جاريالانعان جاڭا ينۆەستيتسيالىق كەزەڭدى تولىعىمەن جۇزەگە اسىرۋ. جاپپاي سيفرلاندىرۋ جانە جاساندى ينتەللەكتىنى ەنگىزۋ كومەكشى قىزمەت اتقارۋمەن شەكتەلمەي، ەكونوميكالىق دامۋدىڭ باستى ارقاۋى بولۋى كەرەك. ج ي نەگىزىندە سيفرلاندىرۋدىڭ ءبىرقاتار باستى مىندەتتەرىن ورىنداۋ قاجەت. بۇل - ەڭبەك ونىمدىلىگىن ارتتىرۋ، ەكونوميكانىڭ ەكسپورتقا باعدارلانعان سەكتورلارىن قالىپتاستىرۋ، قوسىلعان قۇنى جوعارى ءونىم شىعارۋ جانە قازاقستاندى جاھاندىق سيفرلىق ەكونوميكا تىزبەگىنە كىرىكتىرۋ، - دەدى پرەزيدەنت.

مەملەكەت باسشىسىنىڭ ايتۋىنشا، جاڭا ينۆەستيتسيالىق كەزەڭدى ىسكە اسىرۋ ەلىمىزدىڭ يندۋستريا، ەنەرگەتيكا، كولىك سالالارىنداعى زاماناۋي جۇيەسىن قالىپتاستىرۋعا مۇمكىندىك بەرەدى.

- جاساندى ينتەللەكتىنى دامىتۋ، بۇل - ۇران ەمەس، بۇل ەكونوميكالىق يدەولوگيانىڭ نەگىزگى تىرەگى، ءتىپتى ۇلتتىق يدەولوگيامىزدىڭ مىزعىماس تۇعىرى بولۋعا ءتيىس. وسىنداي جاۋاپتى ساتتە دۇرىس، باتىل ءارى ءتيىمدى شەشىمدەردى دەر كەزىندە قابىلداۋ وتە ماڭىزدى. شىنايى ومىرگە تۇك قاتىسى جوق «قۇرعاق» ۇسىنىستار بەرۋ، قىسقاسى، ناتيجەسى جوق ىسپەن اينالىسۋ مۇلدەم بولماۋى قاجەت. بۇكىل مەملەكەتتىك اپپارات ناقتى ناتيجەگە جەتۋ ءۇشىن جۇمىس ىستەۋى كەرەك جانە ونىڭ يگىلىگىن بۇكىل قوعام كورۋگە ءتيىس، - دەدى قاسىم-جومارت توقايەۆ.

كەڭەيتىلگەن وتىرىس بارىسىندا پرەزيدەنت قوعامنىڭ ساياسي مادەنيەتى جانە بەلسەندىلىگى ارتىپ كەلە جاتقانىن ايتتى.