ناۋرىزدى تويلايتىن بىرنەشە ەلدىڭ ۇزدىك شەبەرلەرى استانا جارمەڭكەسىنە قاتىستى

Праздничная ярмарка «Наурыз базары» проходит на EXPO в Астане
Фото: Kazinform

استانا. قازاقپارات- 21-23-ناۋرىز كۇندەرى ەلوردالىق ەكسپو حالىقارالىق كورمە ورتالىعىندا «ناۋرىز بازارى» جارمەڭكەسى وتەدى. وعان ناۋرىزدى تويلايتىن بىرنەشە ەلدىڭ ۇزدىك شەبەرلەرى ارنايى شاقىرىلدى.

«جارمەڭكەگە 52 قولونەرشى جينالعان. ونىڭ 9-ى ناۋرىزدى تويلايتىن وزگە مەملەكەتتەردەن ارنايى شاقىرىلدى. مىسالى قازاقستان اتىنان اتاقتى زەرگەر بەرىك ءالىباي قاتىسۋدا، ازەربايجان مەن تۇرىكمەنستاننان - كىلەم توقۋ ءىسىنىڭ شەبەرى، قىرعىزستاننان - كيىز، ءجۇن تۇتۋ، يراننان - جەز قۇمىرا جاسايتىن شەبەر، تۇركيادان - الەمگە تانىمال رەكوردشى قۇمىراشى، تاجىكستاننان - امبەباپ قولونەرشى كەلدى. ال وزبەكستاندىق ىدىس شەبەرىنىڭ تۋىندىلارى رەسەيدەگى ەرميتاج بەن نيۋ- يوركتەگى مەتروپوليتەن مۋزەيىندە تۇر. تاتارستاننان بۇلعار تاتارلارى مادەنيەتىن ناسيحاتتاپ، قايتا جاڭعىرتۋشى شەبەر كەلسە، باشقۇرتستان شەبەرلەرى جۇننەن توقىلعان ءشالى، بوكەباي ونىمدەرىن الىپ كەلدى»، - دەدى ۇيىمداستىرۋشى نۇرجۇمان ءابدىجامىلوۆ.

Nauryz in Astana
Photo credit: office of the Nura district akim of Astana city

ال استانالىق شەبەرلەر تەرى يلەۋ، قامشى ءورۋ، اعاش وڭدەۋ، كيىز بۇيىمدارى، زەرگەرلىك بۇيىمدارىن ۇسىنۋدا.

«مەن نەگىزىنەن اعاش ىدىستار، قىمىزعا ارنالعان كۇبىلەر جاسايمىن. ودان بولەك، قىلقوبىز، سازسىرناي سەكىلدى مۋزىكالىق اسپاپتار دا جاسايمىن. اعاشتىڭ ساپاسىنا قاراي ءونىم باعاسى وزگەرىپ وتىرادى. ماسەلەن ەت سالاتىن استاۋ باعاسى 30 مىڭ تەڭگەدەن باستالادى. نەگىزگى ماتەريال - قايىڭ اعاشى. نەگىزگى قايىڭ اعاشى ۇشكە بولىنەدى - قىزىل قايىڭ، اق قايىڭ جانە بۇيرا قايىڭنان جاسالادى. بۇگىنگى كورمەدە اسىرەسە شەتەلدىكتەر كوپ قىزىعۋشىلىق تانىتۋدا»،- دەيدى استانالىق اعاش شەبەرى كارىم ەرمەك.

يراندىق ناسەر لۋتفي - 50 جىلدىق تاجىريبەسى بار شەبەر. ول قولونەر سالاسىنداعى جەتىستىكتەرى ءۇشىن يۋنەسكو سىيلىعىن العان. ونىڭ قولونەر بۇيىمدارىنىڭ باعاسى 300 دوللاردان باستالىپ، 4 مىڭ دوللارعا دەيىن جەتەدى.

«مەن يسفاحان قالاسىنان كەلدىم، بۇل يران ونەرىنىڭ ورتالىعى بولىپ سانالادى. بۇل ونەر «گاليامزاني» دەپ اتالادى. «گاليامزاني» - شامامەن 4000 -جىل بۇرىن پايدا بولعان مەتالل سوعۋ ونەرى. جارمەڭكەگە قويىلعان ىدىستار مىستان جاسالعان، قالايىمەن جابىلعان، سودان كەيىن ءار ءتۇرلى ورنەكتەر سوعىلعان. نەگىزىنەن يراننىڭ ۇلتتىق ورنەكتەرى، ءتۇرلى شىعارمالاردىڭ سيۋجەتتەرى مەن موتيۆتەرى جازىلادى. ءبىر ءونىم جاساپ شىعارۋ ءۇشىن 4 ايعا دەيىن ۋاقىت كەتەدى. قازاقستانعا العاش رەت كەلدىم جانە حالىقتىڭ سىپايىلىعى، قوناقجايلىعى ۇناپ جاتىر. ءبىزدىڭ جۇمىسىمىزعا وتە ۇلكەن قىزىعۋشىلىق تانىتۋدا»، - دەدى ن. لۋتفي اگەنتتىك تىلشىسىنە بەرگەن سۇحباتىندا.

سونداي-اق، بۇگىنگى كورمەگە تۇركيانىڭ يزمير ايماعىنان قۇمىرا جاساۋشى احمەت تاشحومدجۋ ارنايى كەلدى. ول از ۋاقىتتا 5,5 مەتر قۇمىرا جاساپ، گيننەستىڭ رەكوردتار كىتابىنا ەنگەن. بۇگىنگى جارمەڭكەگە شەبەر قولدان جاسالعان كەراميك بۇيىمدارىن الىپ كەلدى. اسىرەسە ونىڭ قولاناتىن تەحنيكاسى جانە قۇمىرا بەتىندەگى شىڭىلتىرى سالا ماماندارى اراسىندا وتە جوعارى باعالانادى.

جارمەڭكەدە قولدان جاسالعان بۇيىمداردان باسقا، ازىق-تۇلىكتى تىكەلەي وندىرۋشىلەردەن اۋىل شارۋاشىلىعى تاۋارىن ساتىپ الۋعا بولادى. كەلۋشىلەر ءۇشىن ەش دەلدالسىز جاڭا ونىمدەر قولجەتىمدى. ەل وڭىرلەرىنەن كەلگەن فەرمەرلەر ازىق-تۇلىك جارمەڭكەسىنە 200 توننادان استام ءونىم، ونىڭ ىشىندە ەت جانە ءسۇت ونىمدەرى، كوكونىستەر مەن جەمىستەر جەتكىزىلگەن.

قوناقتار شىعىس تاعامدارى فەستيۆالىنە قاتىسا الادى، وندا مەرەكەلىك داستارحاننىڭ باستى تاعامى - ناۋرىز كوجە، سول سياقتى ىستىق پالاۋ، باۋىرساقتار جانە ەلوردانىڭ ۇزدىك مەكەمەلەرىنەن باسقا دا تاعامدار ۇسىنىلادى.

جاستار ءۇشىن ارقان تارتۋ، اسىق اتۋ، توعىزقۇمالاق جانە تاعى باسقا ۇلتتىق ويىنداردان تۋرنيرلەر ۇيىمداستىرىلدى.

اۆتور

ايجان سەرىكجان قىزى

سوڭعى جاڭالىقتار