ناۋرىز كۇنى بارلىق مەكتەپتەردە ۇلتتىق كۇي ءبىر مەزەتتە وينايدى

Күй
Фото: ortcom.kz

استانا. KAZINFORM - ناۋرىز مەيرامىنا ارنالعان رەسپۋبليكالىق چەللەندج 20-ناۋرىز كۇنى ساعات 12:00-دە وتەدى. بۇل تۋرالى ق ر وقۋ-اعارتۋ مينيسترلىگىنىڭ باسپا ءسوز قىزمەتى مالىمدەدى.

شارا وسكەلەڭ ۇرپاقتىڭ بويىندا رۋحاني-ادامگەرشىلىك قۇندىلىقتار مەن پاتريوتتىق سەزىمدەردى قالىپتاستىرۋعا، ەلدىڭ مادەني مۇراسىن جالعاستىرۋعا، بالالار اراسىندا دومبىرادا ويناۋدى ناسيحاتتاۋعا باعىتتالعان.

«دومبىراشىلار چەللەندجىنىڭ ماقساتى - بالالار مەن جاستاردىڭ، مۇعالىمدەر مەن اتا-انالاردىڭ مۋزىكاداعى شىعارماشىلىق جەتىستىكتەرىن كورسەتۋ جانە دومبىرانى دارىپتەۋ. شاراعا بارلىق نيەت بىلدىرۋشىلەر قاتىسا الادى. بۇل چەللەندج بىلتىر العاش رەت ءوتتى. دومبىرانىڭ كۇمبىرلەگەن ءۇنى ءبىر ۋاقىتتا بارلىق ءبىلىم بەرۋ ۇيىمدارىندا وينادى. بۇل ەلىمىزدىڭ مادەني ءومىرى ءۇشىن ەلەۋلى وقيعا. شارالار «ءبىرتۇتاس تاربيە» باعدارلاماسى اياسىندا وتكىزىلەدى»، - دەيدى تاربيە جۇمىسى جانە قوسىمشا ءبىلىم بەرۋ دەپارتامەنتىنىڭ ديرەكتورى مەرۋەرت مەدەتبەكوۆا.

بيىل ناۋرىز مەيرامى ەلىمىزدىڭ بارلىق جالپى ءبىلىم بەرەتىن مەكتەپتەرىندە 14-23-ناۋرىز ارالىعىندا وتەدى. وسى كۇندەرى تاقىرىپتىق چەللەندجدەر، جالپى ۇلتتىق ەكولوگيالىق اكسيا جانە ۇلتتىق ويىنداردان ءتۇرلى جارىستار ۇيىمداستىرىلادى.

اۆتور

باقىتگۇل اباي قىزى

سوڭعى جاڭالىقتار