ناشاقورلار كوبىندە ا ي ت ۆ، ينسۋلت پەن سۋيسيدتەن كوز جۇمادى

ەكى اي بويى پروكۋرورلار بارلىق وڭىردەگى مەكتەپ وقۋشىلارىمەن جانە ستۋدەنتتەرمەن كەزدەسىپ، سينتەتيكالىق ناشاقورلىقتىڭ الدىن الۋ ماسەلەسىن تالقىلادى، دەپ حابارلايدى Kazinform.

ءىس- شارا باس پروكۋراتۋرانىڭ ەسىرتكى قىلمىسىنا قارسى ءىس-قيمىل جوباسىن جۇزەگە اسىرۋ اياسىندا وتكىزىلدى.

ناۋقان جالپى اۋديتورياسى 220 مىڭنان استام تىڭداۋشىنى قۇرايتىن 2,5 مىڭعا جۋىق ورتا، ورتا ارناۋلى جانە جوعارى ءبىلىم بەرۋ ۇيىمدارىن قامتىدى.

جاستارعا ناشاقورلىققا تاۋەلدىلىكتىڭ سالدارى، ەسىرتكىنى زاڭسىز تاراتۋعا تارتىلۋ قاۋپى جانە مۇنداي ارەكەتتىڭ جازاسى تۋرالى اقپارات بەرىلدى.

پارمەندى اسەرگە قول جەتكىزۋ ءۇشىن ناشاقورلىقتىڭ قۇربانى بولعان جاسوسپىرىمنىڭ وتباسىنداعى قايعىلى وقيعا تۋرالى بەينەروليك كورسەتىلدى.

تالقىلاۋعا وقۋشىلار بەلسەنە قاتىستى.

ولاردى «سالىمشىلاردىڭ» جاۋاپكەرشىلىگى، قۇقىق قورعاۋ ورگاندارىنىڭ ەسىرتكى ساتۋشىلارعا قاتىستى قابىلداعان شارالارى، ناشاقورلىقتىڭ گەنەتيكاعا اسەرى تۋرالى ماسەلەلەر قىزىقتىردى.

رەسمي دەرەك بويىنشا قازاقستاندا 18 مىڭنان استام ناشاقور تىركەلگەن.

دەگەنمەن ناقتى كورسەتكىش الدەقايدا جوعارى جانە 150 مىڭ ادامعا جەتۋى مۇمكىن.

الەمدىك ستاتيستيكاعا سۇيەنسەك 10 ناشاقوردىڭ بىرەۋى عانا وڭالتۋدان ءساتتى وتەدى.

ناشاقورلار ءولىمىنىڭ ەڭ كوپ تاراعان سەبەپتەرى – ا ي ت ۆ، ىشكى اعزالاردىڭ ىدىراۋى، ينسۋلت، جۇرەك توقتاۋى جانە سۋيتسيد.

ەسىرتكى ساۋداسى - ءومىر بويىنا باس بوستاندىعىنان ايىرۋعا دەيىنگى ەڭ اۋىر جازا كوزدەلگەن قىلمىس تۇرلەرىنىڭ ءبىرى.

بۇگىندە ەسىرتكى قىلمىسى ءۇشىن 4 مىڭنان استام ادام تۇرمەدە جازاسىن وتەپ جاتىر، ونىڭ كوپشىلىگى - جاستار.

اۆتور

جانات قاپالبايەۆا