مينيسترلىكتەرگە ليتسەنزيالاردى سوت شەشىمىنسىز قايتارىپ الۋ قۇقىعى بەرىلمەك

استانا. KAZINFORM - ءماجىلىس ءبىرىنشى وقىلىمدا ماقۇلداعان اكىمشىلىك كودەكسكە ەنگىزىلەتىن وزگەرتۋلەر جوباسىندا ارنايى رۇقساتتاردى سوت شەشىمىنسىز قايتارىپ الۋ تەتىگى قاراستىرىلعان.

ب ا ق وكىلدەرىنىڭ ساۋالىنا جاۋاپ بەرگەن ادىلەت ءمينيسترى ازامات ەسقارايەۆ بۇل نورما ەنەرگەتيكا، جەر قويناۋىن يگەرۋ سالالارىنا قاتىستى ەكەنىن ايتتى.

«ۇسىنىلىپ وتىرعان وزگەرىس ەنەرگەتيكا، جەر قايناۋىن يگەرۋ سالالارىن دا قامتي ما؟ سوندا بۇدان بۇلاي سالالىق مينيسترلىكتەر وزدەرى بەرگەن ليتسەنزيانى سوت شەشىمىنسىز- اق قايتارىپ الا ما؟» - دەپ سۇرادى جۋرناليست.

مينيستر زاڭ جوباسىندا كوزدەلگەن 62 باعىتتىڭ ىشىندە جۋرناليست اتاعان سالالار دا بار ەكەنىن ايتتى.

«ءيا، رۇقساتتان ايىرۋ شاراسىن سوت قۇزىرىنان ۋاكىلەتتى ورگاندارعا بەرۋ ءار ءتۇرلى سالادا كوزدەلگەن. ناقتى ايتساق، 62 قۇرامنان تۇرادى. ياعني، ارنايى قۇقىقتان ايىرۋ ۋاكىلەتى مەملەكەتتىك ورگاندارعا بەرىلەدى. ەگەر ليتسەنزيا يەسى ارنايى وكىلەتتى ورگاننىڭ ول شەشىمىمەن كەلىسپەسە، سوتقا جۇگىنىپ ءوز قۇقىعىن قورعاي الادى.

مينيسترلىكتەر سوتتىڭ شەشىمىنسىز ليتسەنزيالاردى توقتاتا الادى. ءبىراق كەلىسپەسە، سوتقا شاعىمدانۋعا حاقىلى»، - دەدى ازامات ەسقارايەۆ.

اۆتور

ەسىمجان ناقتىباي