مينيسترلىك نازاربايەۆ ۋنيۆەرسيتەتىنىڭ بۇرىنعى باسشىسىن سوتقا بەرە مە - ساياسات نۇربەكتىڭ جاۋابى

استانا. KAZINFORM - مينيسترلىك نازاربايەۆ ۋنيۆەرسيتەتىنىڭ بۇرىنعى باسشىسى شيگەو كاتسۋعا قارسى شاعىم تۇسىرمەيدى جانە نازاربايەۆ ۋنيۆەرسيتەتىنىڭ ارىزىنا ارالاسپايدى. بۇل تۋرالى ق ر عىلىم جانە جوعارى ءبىلىم ءمينيسترى ساياسات نۇربەك ايتتى.

ۇكىمەتتە مينيسترگە ب ا ق وكىلى نازاربايەۆ ۋنيۆەرسيتەتىنىڭ بۇرىنعى باسشىسى شيگەو كاتسۋعا قارسى ارىز دايىنداپ جاتقانىن ايتا كەلە، «عىلىم جانە جوعارى ءبىلىم مينيسترلىگى دە ونى سوتقا بەرە مە؟» دەپ سۇرادى.

- بىرىنشىدەن، شيگەو كاتسۋدىڭ سول كەزدەگى مالىمدەمەسى شىندىققا ساي كەلمەيدى. ەكىنشىدەن، البەتتە، وكىنىشكە قاراي بۇل ەلىمىزدىڭ رەپۋتاتسياسىنا نۇقسان كەلتىرەدى. ۇشىنشىدەن، ول مالىمدەمە سالماقتى باسىلىمداردا ەمەس، سونشا ءبىر سەنىمگە يە ەمەس اقپارات اگرەگاتورلارىندا جاريالاندى. سەبەبى سالماقتى باسىلىمداردىڭ ءبارى دە فاكتچەكيگ جاسايتىنىن بىلەمىز. سول سەبەپتى ن ۋ- دىڭ بۇرىنعى باسشىسىن سوتقا بەرۋى بۇل سول ج و و- نىڭ جەكە شارۋاسى، ويتكەنى ولار اۆتونومدى وقۋ ورىنى. ولاردىڭ جۇمىسى جەكە زاڭمەن رەتتەلەدى. ال ءبىزدىڭ مينيسترلىك كاتسۋ مىرزانى سوتقا بەرگەلى جاتقان جوق. ءتيىستى كومەكتى كەرەك بولعان جاعدايدا ۋنيۆەرسيتەتكە بەرە الامىز. سەبەبى بۇل جەردە زيان نازاربايەۆ ۋنيۆەرسيتەتىنە ءتيىپ جاتىر، - دەدى ول.

سونداي-اق، جۋرناليست قازىر اتالعان ۋنيۆەرسيتەتكە قاتىستى ءتۇرلى ارانداتۋشىلىقتاردىڭ نەگە كوبەيىپ كەتكەنىن سۇرادى. ساياسات نۇربەك راسىندا دا، نازاربايەۆ ۋنيۆەرسيتەتىنە اقپاراتتىق شابۋىل جاسالىپ جاتقانىن ايتتى.

- ءبىزدىڭ بولجام بويىنشا، ونى كاتسۋ مىرزانىڭ توبى ۇيىمداستىرىپ وتىر. سەبەبى ول كەتسە دە، ارتىندا ءوزى سەنەتىن كوپ ادام قالدى. سوعىستا بارلىق ءادىس جاقسى دەيدى عوي. ىشكى ارانداتۋلار ءجۇرىپ جاتىر. بايقاساڭىزدار، مۇنداي جايتتار كاتسۋ مىرزانىڭ بەلسەندىلىگىنەن كەيىن پايدا بولا باستادى. ءبىز مۇنى ەڭسەرەمىز دەپ ويلايمىن. ۇكىمەت تە، مينيسترلىك تە نازاربايەۆ ۋنيۆەرسيتەتىنىڭ بۇل شارۋاسىنا ارالاسا المايدى، - دەدى ول.

ەسكە سالا كەتەيىك، بۇعان دەيىن نازاربايەۆ ۋنيۆەرسيتەتىنىڭ بۇرىنعى رەكتورى شيگەو كاتسۋ سۇحبات بەرىپ، ۋنيۆەرسيتەتتىڭ اكادەميالىق ەركىندىگى مەن ينستيتۋتسيونالدىق دەربەستىگىنە قاۋىپ ءتونىپ تۇرعانىن ءمالىم ەتكەن ەدى.

ونىڭ ايتۋىنشا، بۇرىنعى پرەزيدەنت اشقان وقۋ ورىندارى مەن ۇيىمدار 2022 -جىلدان باستاپ بيلىكتىڭ قىسىمىنا ۇشىراي باستاعان.

ايتا كەتەيىك، شيگەو كاتسۋ Kazinform تىلشىسىنە نازاربايەۆ ۋنيۆەرسيتەتىنىڭ باسشىلىعىنان نە سەبەپتى كەتىپ جاتقانىن ايتقان بولاتىن.

اۆتور

ەربول جانات