مينيسترلىك اقىلى وليمپيادالارعا قاتىستى ۇستانىمىن ءتۇسىندىردى

استانا. KAZINFORM - جەكە ۇيىمدار ۇيىمداستىراتىن اقىلى وليمپيادالارعا قاتىستى اتا-انالار مەن پەداگوگتەر اراسىندا ءارتۇرلى پىكىر قالىپتاسقان. جۋرناليستەر تاراپىنان قويىلعان «نەلىكتەن كەيبىر مەكتەپ مۇعالىمدەرى اقىلى وليمپيادالارعا قاتىسۋعا ۇگىتتەيدى؟» دەگەن سۇراققا ق ر وقۋ-اعارتۋ مينيسترلىگى ورتا ءبىلىم كوميتەتىنىڭ ءتوراعاسى قانىبەك جۇماشيەۆ جاۋاپ بەردى.

كوميتەت ءتوراعاسىنىڭ ايتۋىنشا، مينيسترلىك ارنايى بۇيرىقپەن بەكىتىلگەن وليمپيادالار ءتىزىمىن قالىپتاستىرعان. بۇل تىزىمگە رەسپۋبليكالىق بيۋدجەت ەسەبىنەن قارجىلاندىرىلاتىن، قازاقستان اۋماعىندا وتكىزىلىپ، جەتكىلىكتى ابىروي مەن رەيتينگكە يە بولعان وليمپيادالار كىرەدى.

- ءبىز ءبىلىم سالاسىندا ادىلدىك پەن اشىقتىقتىڭ بولعانىن قالايمىز. رەسمي تىزىمدە بار وليمپيادالار عانا مەملەكەت تاراپىنان قولداۋ تابادى. الايدا ءبىز جەكە ۇيىمداردىڭ دا وليمپيادا وتكىزۋگە تالپىنىپ جاتقانىن كورىپ وتىرمىز. ولار جارناما جاساۋ ارقىلى مەكتەپ مۇعالىمدەرى مەن وقۋشىلاردى تارتۋعا تىرىسادى. كەيبىرى ءتىپتى بالالاردى اتا-اناسىنىڭ ەسەبىنەن شەتەلگە اپارىپ، ءتۇرلى بايقاۋلارعا قاتىستىرادى، - دەدى قانىبەك جۇماشيەۆ.

ونىڭ ايتۋىنشا، مينيسترلىك ەشبىر جەكە باستامانى شەكتەمەيدى، دەگەنمەن رەسمي تۇردە تانىلعان ءبىلىم جارىستارىنىڭ ناقتى ءتىزىمى بار، جانە سوعان عانا مەملەكەتتىك قولداۋ كورسەتىلەدى.

 -ءبىز ناقتى ۇستانىمدامىز بارلىق وليمپيادالار اشىق فورماتتا ءوتۋى ءتيىس. ءبىراق مينيسترلىك تەك بۇيرىقپەن بەكىتىلگەن ءبىلىم سايىستارىنا عانا جاۋاپتى. جەكەلەگەن ۇيىمداردىڭ باستاماسىنا شەكتەۋ قويا المايمىز، - دەدى كوميتەت باسشىسى.