ميللياردتار الىپ ۇيرەنگەن سپورتتىق كلۋبتاردىڭ تابەتىن تەجەۋ كەرەك - ءماجىلىس دەپۋتاتى

استانا. KAZINFORM - ءماجىلىس دەپۋتاتى نارتاي سارسەنعاليەۆ وتاندىق سپورتتى دامىتۋعا بولىنەتىن قىرۋار قارجىعا الاڭداتۋشىلىق تانىتىپ، اشىق ەسەپ جۇرگىزۋدى تالاپ ەتتى. سونىمەن قاتار حالىق قالاۋلىسى قازاقستان سپورتىن سىنعا الدى.

- سوڭعى 6 جىلدا قازاقستاندا سپورت سالاسىن قارجىلاندىرۋعا شامامەن 1,4 تريلليون تەڭگە جۇمسالدى. بيىل جانە الداعى ەكى جىلدا بيۋدجەتتەن تاعى 1,3 تريلليون تەڭگە ءبولۋ جوسپارلانعان. باسقاسىنا باس قاتىرماسا دا قازاقستان كاسىبي سپورتقا اقشا قۇيۋدان الدىنا قارا سالماي تۇر، ورتالىق ازيا ەلدەرىن وزعانى ازداي، كانادا، نورۆەگيا، نيدەرلاندى دا بىزگە جەتە الار ەمەس. ءبىراق الەمدىك سپورت رەيتينگىندە قازاقستان 2014 -جىلى 25-ورىندا بولسا، 2023 -جىلى 42-ورىنعا ءتۇسىپ قالدى. مۇنىڭ باستى ءبىر سەبەبى، سپورت تۇرلەرىنىڭ سارالانباۋى. ماسەلەن، جوعارى جەتىستىكتەر سپورتى رەتىندە قارجىلاندىرىلاتىن باعىتتاردىڭ %60- ى وليمپيادالىق ەمەس. ءبىراق ولار بيۋدجەتتەن اۋقىمدى اقشا الىپ كەلەدى، - دەپ نارتاي سارسەنعاليەۆ ۇكىمەت باسشىسىنىڭ اتىنا دەپۋتاتتىق ساۋال جولدادى.

وسى ورايدا حالىق قالاۋلىسى ماجىلىستە قارالىپ جاتقان «سپورت تۋرالى» زاڭ جوباسىندا اتالعان ولقىلىقتى توقتاتۋ ءۇشىن ناقتى وزگەرىستەر ەنگىزىلەتىنىن ايتتى.

- بيۋدجەتتىڭ ءبۇيىرىن تەسپەي سورىپ ۇيرەنگەندەر اقپاراتتىق شابۋىلعا كوشىپ، مەملەكەت سپورتقا اقشا ءبولۋدى توقتاتىپ سالانى تۇرالاتىپ تاستاماق دەگەن جالعان ايىپتاۋلار تاراتۋمەن الەك. ءبىز تەك جەمساۋدى تولتىرۋدى بىلگەنمەن سپورتتا ءىلىپ الار جەتىستىگى جوق سالالارعا بۇگىنگە دەيىن ءبولىنىپ كەلگەن ەسەپسىز اقشانىڭ جولىن كەسۋدى ماقسات تۇتتىق. ماسەلەن سوڭعى 6 جىلدا 49 ميلليارد تەڭگە العان «بارىس» حوككەي كلۋبى، سوڭعى 6 جىلدا 50 ميلليارد تەڭگە العان «استانا» فۋتبول كلۋبى سىندى كوماندالاردىڭ ءار تيىن ءۇشىن ەسەپ بەرەتىن كۇنى تۋۋى ءتيىس. وسىنشا اقشا العانىنا قاراماستان اتالعان كوماندالاردىڭ ءوز ينفراقۇرىلىمدارى جوق، سالماعان. ءبىر عانا «استانا» فۋتبول كلۋبى التى جىل ىشىندە تەك فۋتبول الاڭدارى مەن عيماراتتاردى جالعا الۋعا 1,4 ميلليارد تەڭگە جۇمساعان، - دەيدى ول.

ونىڭ ايتۋىنشا، كەي سپورتتىق ۇجىمدار جاۋاپكەرشىلىكتەن سىتىلۋ ءۇشىن قارجىنى بيۋدجەتتەن ەمەس، كۆازيمەملەكەتتىك سەكتوردان الدىق دەپ اقتالادى.

- سپورتقا بولىنەتىن قاراجاتتى شەكتەۋ تۋرالى شەشىمنىڭ دۇرىس ەكەنىن، ال بۇگىن بايبالام سالعانداردىڭ تۇپكى مۇددەسى نە ەكەنىن انىق اڭعارۋعا بولادى. وسىنشا اقشانىڭ ءبىراز بولىگى لەگيونەرلەردى ۇستاۋعا جۇمسالاتىنى سىبايلاس جەمقورلىققا قارسى ءىس-قيمىل اگەنتتىگى مالىمدەدى. مۇنى توقتاتۋ ءۇشىن ماجىلىستە قازاقستان رەسپۋبليكاسىنىڭ ازاماتى بولىپ تابىلمايتىن سپورتشىلاردى مەملەكەتتىك بيۋدجەت ەسەبىنەن دە، كۆازيمەملەكەتتىك بيۋدجەت ەسەبىنەن دە قارجىلاندىرۋعا تىيىم سالىنادى دەگەن نورما قابىلداندى. ميللياردتار الىپ ۇيرەنگەن كلۋبتاردىڭ تابەتىن تەجەۋ كەرەك. شەتەلدىك سپورتشىنى اكەلۋدەن بولەك، ولارعا ازاماتتىق بەرۋ ءىسى دە ەلدە بەلەڭ الدى. تاۋەلسىزدىك العاننان بەرى قازاقستان 126 شەتەلدىك سپورتشىعا ازاماتتىق بەرگەن، ءبىراق ولاردىڭ ءاربىر ەكىنشىسى كەيىن ءوز ەلىنە قايتىپ كەتكەن. بۇل ماسەلەنى مەملەكەت باسشىسى دا قاتاڭ سىنعا الدى، - دەپ تولىقتىردى ن. سارسەنعاليەۆ.

وسى تۇستا، ءماجىلىس دەپۋتاتى تۋريزم جانە سپورت مينيسترلىگى زاڭ جوباسىنا قاتىستى ءتۇسىندىرۋ جۇمىستارىن كوبەيتۋى قاجەتتىگىن باسا ايتتى. سونداي-اق سپورت فەدەراتسيالارىنىڭ اقپاراتتىق جۇمىسقا قانشا قارجى جۇمسايتىنىن تەكسەرۋ كەرەكتىگىن ەسكە سالدى.

وسىعان دەيىن ءماجىلىس رەزەرۆتەگى اسكەري قىزمەتكە قاتىستى زاڭدى قابىلداعانى تۋرالى جازعان ەدىك.

اۆتور

داۋلەت ىزتىلەۋ