مونوقالالاردى جاستارعا تارتىمدى ەتەمىز - ولجاس بەكتەنوۆ

моноқала
Фото: inbusiness.kz

استانا. KAZINFORM - پرەمەر- مينيستر ولجاس بەكتەنوۆ ۇكىمەت وتىرىسىندا مونوقالالاردى جاستارعا تارتىمدى ەتۋ ءۇشىن قانداي شارالار قابىلدانۋ كەرەكتىگىن ايتتى.

«ءبىز مونوقالالاردى دامىتىپ، جاستار ءۇشىن تارتىمدى ەتكىمىز كەلەدى. ول ءۇشىن تابىستى ارتتىرىپ، جۇمىس ورىندارىن كوبەيتۋ قاجەت. اتالعان مىندەت وندىرىستەردى كەڭەيتۋ، جاڭا جوبالاردى ىسكە قوسۋ، بيزنەسكە قولايلى جاعدايلار جاساۋ ارقىلى جۇزەگە اسىرىلۋعا ءتيىس. اكىمدىكتەر جاس ماماندارعا جاعداي جاساپ، الەۋمەتتىك پاكەتتەر ۇسىنۋى كەرەك. مونوقالالاردا ءوندىرىس ورىندارى بار كومپانيالار دا كورپوراتيۆتىك الەۋمەتتىك جاۋاپكەرشىلىكتەرى تۋرالى ۇمىتپاۋعا ءتيىس. ونىڭ ىشىندە، جۇمىسكەرلەردىڭ قۇقىقتارىن قورعاۋعا، ءوندىرىستى كەڭەيتۋگە، حالىقتىڭ تۇرمىس ساپاسىن جاقسارتۋعا باعىتتالعان الەۋمەتتىك باستامالارعا ءبىرىنشى كەزەكتە نازار اۋدارۋ قاجەت»، - دەدى ۇكىمەت باسشىسى.

سونداي-اق، ول وبلىس اكىمدەرى مونوقالالاردىڭ ينفراقۇرىلىمىن قاراۋسىز قالدىرعانىن اتاپ ءوتتى.

«مونوقالالاردا جايلى تۇرمىس دەڭگەيى ينفراقۇرىلىم وبەكتىلەرىنىڭ تۇراقتى جۇمىسىنا تىكەلەي بايلانىستى. ولاردىڭ كوپشىلىگىندە ينجەنەرلىك جانە الەۋمەتتىك ينفراقۇرىلىم ابدەن توزعان. وبلىس اكىمدىكتەرى جاعدايدى جاقسارتۋ ءۇشىن قاجەتتى شارالار قابىلداعان جوق. سوندىقتان قالىپتى تۇرمىس جاعدايى مەن قىزمەتتەردى قامتاماسىز ەتۋگە باسا نازار اۋدارۋ كەرەك»، - دەدى پرەمەر- مينيستر.

پرەمەر-مينيستر ولجاس بەكتەنوۆ ۇكىمەت وتىرىسىندا اقتوبە، اتىراۋ جانە قاراعاندى وبلىستارىنىڭ مونوقالالارىن دامىتۋدا ساران قالاسىنىڭ ۇلگىسىن نەگىزگە الۋدى تاپسىردى.

«وڭتايلى تاسىلدەر ساران مەن تەكەلىگە مونوقالالار تىزىمىنەن شىعۋعا مۇمكىندىك بەردى. تەكەلى قالاسىندا 10 جىل ىشىندە ونەركاسىپ ءونىمىنىڭ كولەمى 3 ەسەگە ارتتى، ال جۇمىس ىستەپ تۇرعان كاسىپكەرلىك سۋبەكتىلەرىنىڭ سانى ەكى ەسەگە جۋىق ءوستى. ساران قالاسىنىڭ جاعدايى اجەپتاۋىر وزگەردى. دامۋ كورسەتكىشتەرى ايتارلىقتاي ارتا ءتۇستى. ءوڭىر اكىمى قابىلدانعان شارالار مەن جاڭا وندىرىستەر، يندۋستريالىق ايماق تۋرالى باياندادى. ارينە، جاڭا وندىرىستەردىڭ قۇرىلۋى وسى قالالاردىڭ دامۋىنا تىڭ سەرپىن بەرىپ، حالىقتىڭ ءال- اۋقاتىنا وڭ اسەر ەتتى. مەن جاقىندا ساران قالاسىندا بولدىم، وندىرىستەردى ارالاپ، جەرگىلىكتى تۇرعىندارمەن كەزدەستىم. كوڭىل كۇيلەرى جاقسى. 20 جىلدان استام جۇمىسسىز وتىرعان ادامدار جۇمىسقا كىرىستى. بۇل - وزگە مونوقالالارعا ۇلگى بولۋعا لايىق مىسالدار»، - دەدى ول.

ولجاس بەكتەنوۆ ساران قالاسىنىڭ تاجىريبەسى كەلەشەكتە بۇكىل رەسپۋبليكاعا تاراتىلاتىنىن ايتتى.

«سوندىقتان ونەركاسىپ مينيسترلىگى اقتوبە، اتىراۋ جانە قاراعاندى وبلىستارىنىڭ اكىمدىكتەرىمەن بىرلەسىپ، ساران قالاسىنىڭ ۇلگىسى بويىنشا وسى جىلدىڭ سوڭىنا دەيىن حرومتاۋ، ساتبايەۆ، بالقاش جانە قۇلسارى مونوقالالارىندا يندۋستريالىق ايماقتار قۇرۋى قاجەت. كەيىن بۇل تاجىريبەنى باسقا مونوقالالارعا دا تاراتۋ كەرەك»، - دەدى ۇكىمەت باسشىسى.

اۆتور

ەسىمجان ناقتىباي

سوڭعى جاڭالىقتار