مولدوۆا: ەۋروپالىق وداققا قوسىلۋدى جاقتاۋشىلار مەن وعان قارسىلاردىڭ داۋىسى بىردەي بولدى
استانا. KAZINFORM - رەفەرەندۋمدا «ەۋروپالىق» وزگەرىستەرگە قارسى شىققاندار سانى ءسال جوعارىراق، الايدا مولدوۆانىڭ ەۋروپالىق وداققا قوسىلۋىن قولدايتىنداردىڭ داۋىسى ءىس جۇزىندە قارسىلاستاردى قۋىپ جەتىپ جاتىر. بۇل تۋرالى ورتالىق سايلاۋ كوميسسياسى حابارلادى، دەپ جازدى Euronews.
رەفەرەندۋمدا مولدوۆا تۇرعىندارىنا: «ءسىز مولدوۆا رەسپۋبليكاسىنىڭ ەۋروپالىق وداققا قوسىلۋى ءۇشىن كونستيتۋتسياعا وزگەرىستەر ەنگىزۋدى قولدايسىز با؟» دەگەن سۇراققا جاۋاپ بەرۋ ۇسىنىلدى.
حاتتامالاردىڭ %98,11- ىن ساناعاننان كەيىن «ءيا» جاۋابى %49,90، «جوق» - %50,10 داۋىس جينادى. رەفەرەندۋم مولدوۆاداعى پرەزيدەنت سايلاۋىمەن قاتار ءوتتى.
بيۋللەتەندەردىڭ 97,97 پايىزىن وڭدەگەننەن كەيىن قازىرگى پرەزيدەنت مايا ساندۋ كوش باستادى. ول %41,86 داۋىس جينادى. ۇمىتكەرلەردىڭ ەشقايسىسى 50 پايىزدان استام داۋىس جيناي المادى، سوندىقتان 3-قاراشادا سايلاۋدىڭ ەكىنشى تۋرى وتەدى.
ساندۋعا %26,34 داۋىس جيناعان بۇرىنعى باس پروكۋرور الەكساندر ستويانوگلو قارسىلاس بولاتىن كورىندەدى. باتىسشىل باعىتتى ۇستانعان ساندۋ جەكسەنبى كۇنى «قىلمىستىق توپتاردى» رەفەرەندۋمعا نۇقسان كەلتىرگەنى ءۇشىن ايىپتادى.
وسك مالىمەتىنشە، سايلاۋ ۋچاسكەلەرى جەرگىلىكتى ۋاقىت بويىنشا ساعات 21:00-دە جابىلعاننان كەيىن 1,5 ميلليوننان استام سايلاۋشى، ياعني سايلاۋ قۇقىعى بار سايلاۋشىلاردىڭ شامامەن %51- ى داۋىس بەردى.
بۇرىن حابارلانعانداي، و س ك جاريالاعان مالىمەتتەرگە سايكەس، بيۋللەتەندەردىڭ 58 پايىزىن ساناعاننان كەيىن سايلاۋشىلاردىڭ 55,5 پايىزى كونستيتۋتسياعا ە و- داعى باعىت تۋرالى ەرەجەلەردى ەنگىزۋگە قارسىلىق ءبىلدىردى.
قازىرگى سايلاۋ - مولدوۆا ءۇشىن وسى جولداعى العاشقى اۋىر سىناق.
ەسكە سالا كەتسەك، 2023 -جىلدىڭ سوڭىندا مايا ساندۋ مولدوۆا پرەزيدەنتى بولىپ قايتا سايلانۋ نيەتى تۋرالى مالىمدەگەن بولاتىن.
اۆتور
زارينا تۋعانبايەۆا
