موڭعوليادان ەلىمىزگە قانداستار ورالدى

استانا. قازاقپارات - اتاجۇرتىن اڭساعان قانداستار ەلگە ورالدى. 28-اقپان كۇنى اقمولا وبلىسى جىبەك جولى اۋىلىنا موڭعوليانىڭ بايان-ولگەي ايماعىنان 8 وتباسى كەلىپ قونىستاندى. جىلدار بويى اتاجۇرتىن اڭساعان قانداستاردىڭ كوڭىلى شات.

ويتكەنى بۇگىن اتامەكەنىمەن، تۋعان توپىراعىمەن قاۋىشاتىن كوپتەن كۇتكەن ءسات. بايان-ولگەي ايماعىنان كەلگەن 8 جانۇيا اقمولا وبلىسى جىبەك جولى اۋىلىنا تابان تىرەدى. ۇكىمەت وكىلدەرى، اۋىل تۇرعىندارى الىستان جەتكەن اعايىندى شاشۋ شاشىپ، قۋانىشپەن قارسى الدى.

جەكسەنباي قايىپ، قانداس:

- اعايىندار بۇگىن مىنە باس قوسىپ، قۇت بوپ جاتىر. مەن رۋحانيات سالاسىندا قىزمەت اتقارعان اداممىن. 18 جىل ول جاقتا قازاق مەكتەبىن اشىپ، سوندا جۇمىس ىستەدىم. قازاقتاردىڭ رۋحانياتىن كوتەرەيىن، قانى قازاق بالالار تاربيەلەيىن. ول جاقتا دا اعايىنىمىز بار. قىزمەتتەرگە بايلانىستى كەشەۋىلدەپ كەلىپ، بۇگىنگى جىلدار ءناسىپ بولىپ جاتىر.

قالي مەكەنباي ۇلى، قانداس:

- جىبەك جولىنا كەلۋ ءبىراز ارمان بولعان نەگىزى. وسى استاناعا جاقىن بولسا ەكەن، بالالار وسى قازاق جەرىندە وسسە ەكەن، قازاق ۇرپاق بولسا ەكەن وسىلار دەپ. سول بالالار دەپ كەلىپ جاتىرمىز. قازىر اعايىن، تۋىس ءبارى قارسى الىپ جاتىر قۋانىشپەن. وتە قۋانىشتىمىن. ارت جاقتا قالعان اعايىن-تۋىستار وسىندا كەلسىن كوشىپ.

بايان-ولگەي ايماعىنان جازدا تاعى 12 وتباسى اتامەكەنگە كەلەدى

يگى باستامانىڭ جۇزەگە اسۋىنا ءماجىلىس دەپۋتاتى قازىبەك يسا مۇرىندىق بولدى. جات جەردە وتانىنا ىنتىزار بوپ جۇرگەن قانداستاردىڭ بۇل ءبىر پاراسى عانا، جازدا تاعى 12 وتباسىنى قونىستاندىرۋ جوسپارلانىپ وتىر.

قازىبەك يسا، ق ر پارلامەنتى ءماجىلىسىنىڭ دەپۋتاتى:

- 34 جىلدىڭ ىشىندە 1,5 ميلليوننان استام قانداستار كوشىپ كەلگەن بىزگە. پرەزيدەنت قاسىم-جومارت توقايەۆتىڭ ءوزى دە قانداستارعا باسا نازار اۋدارىپ وتىر. ءبىز قانداستاردى اتامەكەنگە كەلۋىن تولىق قولدايمىز جانە وعان بارلىق قاجەتتى جاعدايلاردى جاسايمىز دەپ ايتقان ءسوزىن بىلەسىزدەر.

وتانداستار قورىنىڭ مالىمەتىنشە، شەتەلدە 7 ميلليونعا جۋىق قازاق بار. سونىڭ ءبىر جارىم ميلليونى كەلۋگە دايىن. ەلگە قونىس اۋدارعان قانداستىڭ اربىرىنە «ەڭبەك» مەملەكەتتىك باعدارلاماسى اياسىندا 275 مىڭ تەڭگە كولەمىندە ءبىر جولعى الەۋمەتتىك تولەم بەرىلەدى.

سونداي-اق تۇرعىن ءۇي جالداۋعا 1 جىل بويى اي سايىن 15 تەن 30 ايلىق ەسەپتىك كورسەتكىشكە دەيىن قاراجات ۇسىنىلادى. باسپانا ساتىپ الۋعا باستاپقى جارنا رەتىندە 4 جارىم ميلليون تەڭگە دە قاراستىرىلادى.

ءشارىپحان شايمۇرات، «تۇران» قانداستارعا قىزمەت كورسەتۋ ورتالىعىنىڭ باسشىسى:

- 8 وتباسى كوشىپ كەلدى. وسىندا ورنالاسۋعا قۇجاتتارىن، ىقتيار حاتتارىن تاپسىرىپ قويدى. ىقتيار حاتىن الىپ العاندار قانداسقا تاپسىرىپ قويدى. ءۇشىنشى ايدىڭ 1-ىنەن باستاپ ءبىز ەكىنشى جارنانىڭ كوشىپ كەلەتىن قانداستىڭ ءتىزىمىن الايىق دەپ جاتىرمىز. ول وسى ارشالى رايونى مەن شورتاندى رايونىنا كەلىپ ورنالاسۋعا، كۆوتاسىن الۋعا، ازاماتى بولۋعا ەكى جاقتى كەلىسىمشارت جاسادىق.

قوعامدىق قوردىڭ كومەگىمەن ءبىر جىل ىشىندە 127 وتباسى ەلگە كوشىپ كەلگەن. باسىم بولىگى سولتۇستىك قازاقستان مەن اقمولا وبلىستارىنا قونىس اۋدارعان. الداعى ۋاقىتتا دا ەلدەن جىراقتا جۇرگەن قانداستارعا قور تاراپىنان زاڭدىق جانە الەۋمەتتىك كومەكتەر كورسەتىلمەك.

24.kz