موڭعوليادا قانشا قازبا بايلىق بار؟

استانا. قازاقپارات - موڭعوليا كەيىنگى 20 جىلدا شيكىزاتىن جاپپاي الەم نارىعىنا شىعارا باستادى. ەلدىڭ ۇلتتىق ستاتيستيكا باسقارماسىنىڭ حابارلاۋىنشا، بىلتىرعى بارلىق ەكسپورتتىڭ 99 پايىزى تاۋ-كەن ءوندىرىسىنىڭ ەنشىسىندە. ناتيجەسىندە وتكەن جىلى موڭعوليا ەكونوميكاسى 6,4 پايىزعا ءوستى.

 وسىلايشا شيكىزاتتى ءوندىرۋ جانە ەكسپورتتاۋ موڭعوليانىڭ «ۆيجن-2050» باعدارلاماسىنىڭ وزەگىنە اينالدى. موڭعوليادا پايدالى قازبا بايلىقتىڭ 80-نەن استام ءتۇرى بار. ا ق ش- تىڭ گەولوگيالىق قىزمەتىنىڭ زەرتتەۋى بويىنشا، راستالعان كەن قورى مىناداي: 

 تەمىردىڭ 400 ميلليوننان استام، مىستىڭ 55,2 ميلليون، سيرەك مەتالدىڭ 30 ميلليوننان استام، ۋراننىڭ 190 مىڭ، موليبدەننىڭ 54 مىڭ جانە التىننىڭ 2 جارىم مىڭ تونناسى كەزدەسەدى.

 موڭعوليادا كومىر كوپ. قورى بويىنشا الەمدەگى العاشقى وندىققا كىرەدى. ەل اۋماعىندا 12 باسسەين بار. ولاردا 32,6 ميلليارد توننا كومىر بارى راستالعان. بۇدان بولەك موڭعوليانىڭ كومىر ونەركاسىبى قاۋىمداستىعىنىڭ مالىمەتى بويىنشا، ءالى بارلاۋ جۇمىسى جۇرگىزىلمەگەن 173 ميلليارد تونناداي كومىر بار. بىلتىر شامامەن 84 ميلليون تونناسى ەكسپورتالعان. بۇل الدىڭعى جىلعى كورسەتكىشتەن 200 مىڭ تونناعا كوبىرەك.

موڭعوليا جەر اۋماعى بويىنشا الەمدە 17-ورىندا. ءبىراق حالىق سانى 3 جارىم ميلليونعا ارەڭ جەتەدى. دەگەنمەن، سالتقا بەرىك. 600 مىڭى ءالى كۇنگە كوشپەلى ءومىر سالتىن ۇستانادى. ءتىپتى 1 جارىم ميلليون ادام تۇراتىن ەل استاناسى ۇلانباتىردا كيىز ۇيدە تۇراتىندار جەتىپ ارتىلادى.

 24.kz