موڭعول حالقى ۇلتتىق مەرەكەسىن تولىق اپتا بويى تويلايدى
استانا. KAZINFORM - موڭعوليادا بيىل ۇلتتىق مەرەكە «ناادام» 10- 17- شىلدە ارالىعىندا اتاپ وتىلەدى، دەپ حابارلايدى مونسامە.
4 -ماۋسىم كۇنى وتكەن ۇكىمەت وتىرىسىندا موڭعوليانىڭ ۇلتتىق مەرەكەسى - «ناادامدى» اتاپ وتۋگە بايلانىستى شەشىم قابىلداندى.
2025 -جىلى رەسمي مەرەكە بولىپ سانالاتىن 12 جانە 13- شىلدە كۇندەرى سەنبى جانە جەكسەنبىگە سايكەس كەلگەندىكتەن، ولار سارسەنبى مەن بەيسەنبىگە - 16 جانە 17- شىلدەگە اۋىستىرىلدى. وسىلايشا، ناادامعا ارنالعان دەمالىس كۇندەرى 10- شىلدەدە باستالىپ، سەگىز كۇنگە سوزىلادى.
بۇل شەشىم ازاماتتاردىڭ ۇسىنىستارى مەن وتىنىشتەرىنە ساي قابىلداندى. ونىڭ ماقساتى - مەرەكەنى كەڭ كولەمدە اتاپ وتۋگە مۇمكىندىك بەرۋ، ىشكى تۋريزمدى قولداۋ جانە جۇمىس پەن جەكە ءومىر اراسىنداعى تەپە- تەڭدىكتى ساقتاۋ.
ايتا كەتەيىك، ناادام - موڭعولياداعى ەڭ ءىرى ءارى ماڭىزدى ۇلتتىق مەرەكە. ونىڭ اتاۋى «ويىن- ساۋىق» نەمەسە «ويىندار» دەگەن ماعىنا بەرەدى. بۇل مەرەكە ەجەلدەن بەرى موڭعول حالقىنىڭ تاۋەلسىزدىگى مەن بىرلىگىنىڭ سيمۆولى رەتىندە تويلانىپ كەلەدى.
بۇعان دەيىن موڭعوليادا العاش رەت «التىن قايشى - 2025» اتتى قوي قىرقۋ بويىنشا حالىقارالىق بايقاۋ جانە «ءسۇت فەستيۆالى - 2025» فەستيۆالى وتەتىنى بەلگىلى بولدى.
