موبيلدى اۋدارىمدار: بيىلدان باستاپ جەكە كاسىپكەرلەر نەنى ەسكەرۋى كەرەك
استانا. KAZINFORM - بيىلدان باستاپ ەكىنشى دەڭگەيلى بانكتەر موبيلدى اۋدارىمدارى ءتيىستى شەكتەن اسقان جەكە كاسىپكەرلەر تۋرالى مالىمەتتى مەملەكەتتىك كىرىستەر كوميتەتىنە جولدايتىن بولادى.
- ق ر قارجى ءمينيسترىنىڭ 2022 -جىلعى № 323 بۇيرىعىنا سايكەس، بانكتەر قاتارىنان ءۇش اي بويى ءار اي سايىن 100 جانە ودان دا كوپ ءارتۇرلى تۇلعالاردان كاسىپكەرلىك قىزمەتتى جۇزەگە اسىرۋعا ارنالماعان بانك شوتىنا اقشا قاراجاتىن العان جەكە تۇلعا جايلى مالىمەتتى جولدايدى. 2025 -جىلدان باستاپ 2024 -جىلدىڭ قورىتىندىسى بويىنشا جەكە كاسىپكەرلەر، زاڭدى تۇلعالاردىڭ باسشىلارى جانە ولاردىڭ جۇبايلارى تۋرالى اقپاراتتى ۇسىناتىن بولادى. بۇل شارا جاسىرىن كىرىستەر مەن تىركەلمەگەن كاسىپكەرلەردى انىقتاۋعا باعىتتالعان، ويتكەنى كوپتەگەن كاسىپكەرلەر تاۋارلار، جۇمىستار مەن قىزمەتتەر ءۇشىن تولەمدى كاسىپكەرلىك قىزمەتكە ارنالماعان جەكە شوتتارعا موبيلدى اۋدارىمدار ارقىلى قابىلدايدى، - دەپ ءمالىم ەتتى م ك ك ماماندارى.
بانكتەرگە مالىمەتتى مەملەكەتتىك ورگانعا جولداۋ تالابى كەزەڭ-كەزەڭىمەن ەنگىزىلىپ كەلەدى:
2023 -جىلدان باستاپ مەملەكەتتىك قىزمەتشىلەر، وعان تەڭەستىرىلگەن جاندار جانە ولاردىڭ جۇبايلارى
2024 -جىلدان باستاپ مەملەكەتتىك مەكەمەلەردىڭ، كۆازيمەملەكەتتىك سۋبەكتىلەردىڭ جۇمىسشىلارى جانە ولاردىڭ جۇبايلارى، 2025 -جىلدان باستاپ جەكە كاسىپكەرلەر، زاڭدى تۇلعالار باسشىلارى جانە ولاردىڭ جۇبايلارى، 2026 -جىلدان باستاپ ەلدەگى باسقا دا ازاماتتار بويىنشا مالىمەتتەر جولداناتىن بولادى.
نە وزگەرۋى مۇمكىن؟
قولدانىستاعى ەرەجە بويىنشا، كاسىپكەر رەتىندە تىركەلمەگەن جەكە تۇلعانىڭ شوتىنا جاسالعان موبيلدى اۋدارىم سانى قاتارىنان 3 اي بويى 100-دەن اسسا، سالىق ورگانى ونى (كاسىپكەرلىك ارەكەتپەن اينالىسىپ جۇرگەن-جۇرمەگەنىنە كوز جەتكىزۋ ءۇشىن) ءوز باقىلاۋىنا الادى.
الايدا بۇل نورما قولدانىستاعى كاسىپكەرلىك تۋرالى كودەكسكە ساي كەلمەيدى. كودەكستىڭ 35-بابى 2-تارماعى 2-تارماقشاسىندا ەڭ تومەنگى ايلىقتىڭ (85 مىڭ تەڭگە) 12 ەسەلەنگەن مولشەرىنەن اساتىن تابىس تاپقان جەكە تۇلعانى سالىق ورگانى دارا كاسىپكەر رەتىندە تانىپ، ەسەپكە قويا الاتىنى ايتىلعان.
«100 اۋدارىم» قاعيداتى مەن كاسىپكەرلىك كودەكستىڭ تالابىن بىرىزدەندىرۋ ءۇشىن وسى 35-باپتاعى 2-تارماقتىڭ 2-تارماقشاسىن وزگەرتىپ جازۋ كوزدەلىپ وتىر.
ونىڭ جاڭا رەداكسياسى مىنانداي بولماق:
«1 (ءبىر) جەكە تۇلعانىڭ قاتارىنان كۇنتىزبەلىك 3 (ءۇش) ايدىڭ ءارقايسىسىنىڭ ىشىندە 100 (ءجۇز) جانە ودان دا كوپ ءارتۇرلى تۇلعادان بانك شوتىنا جالپى سوماسى 3 ەڭ تومەنگى جالاقىدان اساتىن اقشا قاراجاتىن الۋى» دەپ وزگەرتۋ ۇسىنىلدى (3 ە ت ج - 255 مىڭ تەڭگە)».
بۇل ەرەجە ازىرشە ۇلتتىق بانكتىڭ قاراۋىندا. ول ەنگىزىلسە، ەندىگى جەردە ءۇش اي قاتارىنان ءار ايدا جاسالعان 100 اۋدارىم سوماسى 255 مىڭ تەڭگەدەن اسىپ وتىرعان جاعدايدا عانا كاسىپكەر ەرەجە بۇزعان بولىپ سانالادى.
جازا باسقان كاسىپكەرگە جازا بار
زاڭ بويىنشا، كاسىپكەرلىك قىزمەتپەن ونى تىركەمەستەن اينالىسقان جەكە ازاماتتارعا سالىناتىن ايىپپۇل مولشەرى - 15 ا ە ك (2025 -جىلى 1 ا ە ك - 3932 تەڭگە)، ياعني 58980 تەڭگە. بۇل زاڭ بۇزۋشىلىق قايتالانعان جاعدايدا - 30 ا ە ك، ياعني 117960 تەڭگە ايىپپۇل سالىنادى.
ال اكىمشىلىك قۇقىق بۇزۋشىلىق تۋرالى كودەكستىڭ 275-بابىنىڭ 1 جانە 2-تارماقتارىنا سايكەس، سالىق تولەۋشى سالىق سالۋ وبەكتىلەرىن جاسىرىپ قالعان جاعدايدا، سول جاسىرىلعان سالىق سوماسىنىڭ 200 پايىزى مولشەرىندە ايىپپۇل تاعايىندالادى. بۇل جاعداي ءبىر جىل ىشىندە قايتالانسا، تولەنبەگەن سالىق سوماسىنىڭ %300 مولشەرىندە ايىپپۇل سالىنادى.
كاسىپكەر چەك بەرۋدى ءبىرىنشى رەت ۇمىتىپ كەتكەن جاعدايدا جاي عانا ەسكەرتۋمەن قۇتىلادى. ءبىر جىل ىشىندە مۇنداي ولقىلىق قايتا جاسالسا، 30-دان 40 ا ە ك- كە دەيىن (117960 - 157280 تەڭگە) ايىپپۇل ارقالايدى.
ەسكە سالساق، قارجى مينيسترلىگىنىڭ مەملەكەتتىك كىرىستەر كوميتەتى Kazinform ساۋالىنا جولداعان جاۋاپتا ەلدەگى قايىرىمدىلىق قورلارى ءبىر جىلدا بيۋدجەتكە قانشا سالىق تولەگەنىن ءمالىم ەتكەن ەدى.
ەربول جانات
اۆتور
