موبيلدى اۋدارىم: سالىق كودەكسىنە قانداي وزگەرىستەر ەنگىزىلۋى مۇمكىن

استانا. KAZINFORM - قارجى مينيسترلىگىنىڭ مەملەكەتتىك كىرىستەر كوميتەتى موبيلدى اۋدارىمدارعا سالىق سالۋ بولىگىندە قاراستىرىلىپ جاتقان وزگەرتۋلەرگە قاتىستى پىكىر ءبىلدىردى.

«قازىرگى ۋاقىتتا جەكە تۇلعالاردىڭ بانكتىك ەسەپشوتتارىندا جۇرگىزىلەتىن وپەراتسيالاردى قازاقستان رەسپۋبليكاسى پرەمەر-ءمينيسترىنىڭ ورىنباسارى -قارجى ءمينيسترىنىڭ 2022-جىلدىڭ 29-ناۋرىزىنداعى №323 بۇيرىعىمەن ايقىندالعان كاسىپكەرلىك قىزمەتتى جۇزەگە اسىرۋدان كىرىس الۋ بەلگىلەرى بار وپەراتسيالارعا جاتقىزۋدىڭ قولدانىستاعى ولشەم شارتتارىنا وزگەرتۋلەر ەنگىزۋ ماسەلەسى قاراستىرىلىپ جاتىر. جەكە كاسىپكەر رەتىندە تىركەلمەۋگە قۇقىعى بار تۇلعالاردى الىپ باستاۋ بولىگىندە قولدانىستاعى ولشەم شارتتارعا وزگەرتۋلەر ەنگىزۋ ماسەلەسى پىسىقتالىپ جاتىر»، - دەپ اتاپ ءوتتى كوميتەتتەن اگەنتتىكتىڭ رەسمي ساۋالىنا وراي.

ولشەم شارت بويىنشا مىناداي رەداكسيا ۇسىنىلادى: «ءبىر جەكە تۇلعانىڭ بانكتىك ەسەپشوتىنا ءۇش اي بويى جالپى سوماسى 3 ەڭ تومەنگى جالاقىدان اساتىن اقشا قاراجاتىن اي سايىن ءارتۇرلى تۇلعادان 100 جانە ودان دا كوپ الۋى».

اۆتور

مارلان جيەمباي