مۇرات جۇرىنوۆ باسقاراتىن ۇلتتىق عىلىم اكادەمياسى جابىلدى ما

ғылым академиясы
Фото: ticketon.kz

استانا. KAZINFORM - مۇرات جۇرىنوۆ باسقاراتىن ۇلتتىق عىلىم اكادەمياسى جابىلدى ما؟ بۇل ساۋالعا عىلىم جانە جوعارى ءبىلىم ۆيتسە- ءمينيسترى دارحان احمەد-زاكي Jibek Joly تەلەارناسىنىڭ JJ Talk باعدارلاماسى ەفيرىندە جاۋاپ بەردى.

ەفير كەزىندە دارحان احمەد-زاكي پرەزيدەنت جانىنداعى ۇلتتىق عىلىم اكادەمياسى مارتەبەسىنىڭ زاڭمەن رەتتەلەتىنىن ايتىپ جاتقاندا باعدارلاما جۇرگىزۋشىسى سپيكەردىڭ ءسوزىن ءبولىپ، «بۇعان دەيىنگى عىلىم اكادەمياسى جابىلدى ما؟» دەگەن ساۋال قويدى.

«ول جابىلعان جوق. كەلەشەكتە جابىلاتىن شىعار. ول اكادەميا - قوعامدىق بىرلەستىك. جاڭا اكادەميانىڭ جاڭا مارتەبەسى بولادى»، - دەپ قىسقا قايىردى ۆيتسە-مينيستر.

ەسكە سالا كەتەيىك، وتكەن جىلى قاراشادا Jibek Joly تەلەارناسىنىڭ «ۋادە» باعدارلاماسىنا بەرگەن سۇحباتىندا عىلىم جانە جوعارى ءبىلىم ءمينيسترى ساياسات نۇربەك مۇرات جۇرىنوۆ باسقاراتىن ۇلتتىق عىلىم اكادەمياسى تاراۋى ءتيىس دەگەن بولاتىن.

«ك س ر و كۇيرەگەن 90-جىلدارى مەملەكەتتىك مارتەبەسى بولعان، اكادەميك قانىش ساتبايەۆ نەگىزىن قالاعان عىلىم اكادەمياسى مارتەبەسىن جوعالتا باستادى. سول كەزدە اكادەميادا بىرنەشە ترانسفورماتسيا بولدى. ماسەلەن، وتە ءبىر قىزىق فورمات - سول كەزدەگى ءبىلىم ءمينيسترى شكولنيك عىلىم اكادەمياسىنىڭ پرەزيدەنتى لاۋازىمىن قوسا اتقارعان. 2003 -جىلى اكادەميا مەملەكەتتىك ەمەس ۇيىم رەتىندە ءبولىنىپ شىعىپ، مەملەكەتتىك مارتەبەسىن جوعالتتى. وسى كۇنگە دەيىن مۇرات جۇرىنوۆ باسقارىپ كەلە جاتقان اكادەميا رەسپۋبليكالىق مەملەكەتتىك ەمەس قوعامدىق بىرلەستىك رەتىندە جۇمىسىن اتقارىپ كەلەدى. ونىڭ ءوزىنىڭ بىرنەشە قۇزىرەتى بولدى. مىسالى، ول جىل سايىن عىلىم تۋرالى ەسەپتى پىسىقتاپ، پرەزيدەنتكە ۇسىنادى. بىرنەشە عىلىمي باسىلىم شىعارىپ، باسقارادى»، - دەگەن ەدى ۆەدومستۆو باسشىسى.

اۆتور

داۋلەت ىزتىلەۋ

سوڭعى جاڭالىقتار