مۇناي كەلىسىمشارتتارىنىڭ شارتىن اشۋ قاجەت - «بايتاق» پارتياسى ءتوراعاسىنىڭ جاڭا ورىنباسارى

استانا. KAZINFORM - «بايتاق» پارتياسى ءتوراعاسىنىڭ ورىنباسارى قىزمەتىنە كىرىسكەن ولەگ پاك جاڭا لاۋازىمدا قانداي ماسەلەلەرمەن اينالىساتىندىعىن ايتتى. ولاردىڭ قاتارىندا مۇناي ءوندىرۋشى كومپانيالارمەن جاسالعان كەلىسىمشارتتاردىڭ شارتىن اشۋ، كومىر حيمياسىن، ا ە س توڭىرەگىندەگى ينفراقۇرىلىمداردى دامىتۋ بار.

ونىڭ اتاپ وتۋىنشە، قازىردىڭ وزىندە پارتيا كومىر حيمياسى سالاسىنداعى جوبالاردى دامىتىپ جاتىر. بۇل سالانىڭ الەۋەتى 15 ميلليارد دوللاردى قۇرايدى جانە 20 مىڭ جاڭا جۇمىس ورنىن قۇرۋعا مۇمكىندىك بەرەدى.

«ءبىز كومىردى ەلەكتر ەنەرگياسى مەن جىلۋ الۋ ءۇشىن بۇگىنگىدەي جاقپاۋدى، كەرىسىنە ونى تەرەڭ وڭدەۋدى ۇسىنامىز. كومىردەن پوليمەرلەر، تىڭايتقىشتار سياقتى 500-دەن استام ءونىم الۋعا بولادى»، - دەدى ول.

سونىمەن قاتار ول پارتيا ءتوراعاسىنىڭ ورىنباسارى رەتىندە جۇمىسىنىڭ باستى باعىتتارىنىڭ ءبىرى مۇناي كەلىسىمشارتتارىنىڭ شارتىن اشۋعا باعىتتالاتىندىعىن ايتادى. ونىڭ پايىمىنشا، تەڭىز، قاشاعان جانە قاراشىعاناق كەن ورىندارى بويىنشا باسالعان كەلىسىمشارتتاردى قايتا قاراستىرۋ قاجەت. سونىمەن قاتار اتالعان كەنىشتەردە وندىرىلەتىن شيكىزاتتى ەكسپورتقا شىعارعاننان گورى تەرەڭ وڭدەۋ وتە ورىندى.

«اتوم ەلەكتر ستانساسىن سالىپ قانا قويماي، ونىڭ اينالاسىندا قاجەتتى ينفراقۇرىلىمدى قۇرۋ ءۇشىن قۇرىلىسشىعا ۇلتتىق تالابىمىزدى قالىپتاستىرۋىمىز كەرەك»، - دەدى ول.

بۇعان دەيىن «پاراسات» كاسىپكەرلەر اليانسى» قاۋىمداستىعى قازاقستاننىڭ «بايتاق» جاسىلدار پارتياسىنا قوسىلعانىن جازعان ەدىك.

«پرەزيدەنت سوڭعى جولداۋىندا بيزنەستى قورعاۋ قاجەتتىگىن ايتتى. راسىندا دا بۇگىندە بيزنەسكە ەكونوميكالىق، ساياسي باعىتتا ۇلكەن قولداۋ قاجەت. ويتكەنى، كاسىپكەر تاۋەكەلگە بارىپ، قاراجات ءبولۋ ارقىلى ۇلكەن جوبالاردى جۇزەگە اسىرۋ ارقىلى سالىق تولەيدى، جاڭا جۇمىس ورىندارىن قامتاماسىز ەتەدى. مەملەكەتىمىز نارىقتىق ەكونوميكادا ءومىر ءسۇرىپ جاتىر. دەمەك، نارىقتىق ەكونوميكانىڭ نەگىزگى كورسەتكىشى - كاسىپكەرلىك. كاسىپكەرلەر كاسىپكەرلىكپەن اينالىسقاندا ەش نارسەدەن قورىقپاي جۇمىس ىستەۋى ءتيىس. ال ول ءۇشىن قوعامدىق مىقتى لوببيشىلەر بولۋى ءتيىس. سوندىقتان «بايتاق» جاسىلدار پارتياسى «پاراسات» كاسىپكەرلەر اليانسى» قاۋىمداستىعىمەن قوسىلىپ، كاسىپكەرلىكتى قولداۋ ءۇشىن ۇلكەن باعىت اشىپ جاتىر»، - دەدى «بايتاق» پارتياسىنىڭ ءتوراعاسى ازاماتحان ءامىرتاي.

ونىڭ اتاپ وتۋىنشە، «پاراسات» كاسىپكەرلەر اليانسى» قاۋىمداستىعىنىڭ باسقارما ءتوراعاسى ولەگ پاك «بايتاق» پارتياسى ءتوراعاسىنىڭ ورىنباسارى بولادى. ول پارتيانىڭ بيزنەس قوعامداستىقپەن ءوزارا ءىس- قيمىل ماسەلەلەرىنە جەتەكشىلىك ەتەدى.

«بايتاق» - ساياسي پارتيا. باعىتىمىز - قورشاعان ورتانى قورعاۋ، جاسىل ەكوميكا. ساياسي پارتيا رەتىندە سايلاۋلارعا قاتىسىپ، ۇمىتكەرلەر دايىندايمىز، سايلاۋ شتابتارىن قۇرامىز. ال سايلاۋ بولماعان كەزدە قورشاعان ورتانى قورعاۋ، جاسىل ەكونوميكانى كوتەرۋ باعىتىنداعى ەكونوميكالىق ساياساتپەن اينالىسامىز. ال جاسىل ەكونوميكانى دامىتۋ ءۇشىن بىزگە سەنىم ارتاتىن كاسىپكەرلەر، ينۆەستورلار كەرەك. «پاراسات» كاسىپكەرلەر اليانسى» قاۋىمداستىعى پارتيامىزعا جاڭا مۇشەلەر اكەلەدى. كەلەسى جىلى اۋدان جانە وبلىستىق اۋقىمداعى قالالاردىڭ اكىمدەرىن سايلاۋ وتەدى. اتالعان سايلاۋعا قاتىسۋ ءۇشىن ۇمىتكەرلەرىمىز بولۋى كەرەك. كاسىپكەرلەر اراسىنان ءىسىن، جۇمىسىن بىلەتىن ۇمىتكەرلەردى تارتۋىمىز قاجەت. ەرتەڭ ول اكىم بولعاندا پارتيامىزدى سوزگە قالدىرماي، مەملەكەتكە پايداسىن اكەلەتىن ۇمىتكەر بولۋى ءتيىس»، - دەدى ازاماتحان ءامىرتاي.

ونىڭ دەرەگىنشە، بۇگىندە پارتيانىڭ قاتارىندا 102 مىڭ مۇشە بار. سوڭعى ۋاقىتتا كەنتاۋ مەن تەمىرتاۋ قالاسىندا فيلالدارى اشىلدى.

اۆتور

مارلان جيەمباي