مۇناي باعاسىنىڭ ءوسۋى تەڭگە باعامىنا ءالى تولىق اسەر ەتپەدى - ساراپشى

استانا. KAZINFORM - قازاقستاننىڭ قارجىگەرلەر قاۋىمداستىعىنداعى جەتەكشى ساراپشى زارينا سكريپچەنكو مامىر ايىندا تەڭگە باعامىنا قاي فاكتورلار ىقپال ەتەتىنىن ءتۇسىندىردى.

ساراپشىنىڭ ايتۋىنشا، مامىر ايىندا ۇلتتىق ۆاليۋتانى قولداۋعا قازاقستاننىڭ ساۋدا بالانسىنىڭ جاقسارۋى اسەر ەتۋى مۇمكىن.

ماسەلەن، 2024 -جىلدىڭ ءبىرىنشى توقسانىندا بىلتىرعى سايكەس كەزەڭمەن سالىستىرعاندا سىرتقى ساۋدانىڭ وڭ سالدوسى 9 پايىزعا نىعايىپ، يمپورت كولەمى ازايعان.

«كەيىنگى كەزدەگى مۇناي باعاسىنىڭ ءوسۋى ۇلتتىق ۆاليۋتا باعامىنا ءالى دە تولىق اسەر ەتكەن جوق. سەبەبى ەكسپورتتاۋشىلاردان ەلگە ۆاليۋتالىق تۇسىمدەردىڭ اۋدارىمىندا وپەراتسيالار تولىق اياقتالماعان»، - دەپ ءتۇسىندىردى زارينا سكريپچەنكو.

ونىڭ پايىمىنشا، قازاقستاننىڭ مەملەكەتتىك باعالى قاعازدارىن ساتىپ الۋعا مۇددەلى شەتەلدىك ينۆەستورلاردان تەڭگەگە سۇرانىس ارتۋى مۇمكىن.

ۇلتتىق بانكتىڭ مالىمەتىنشە، ءبىرىنشى توقساندا بەيرەزيدەنتتەردىڭ سالىمدارى 443 ميلليون ا ق ش دوللارىنا ءوستى.

مامىردىڭ اياعىندا تەڭگەنىڭ ءداستۇرلى نىعايۋى توقساندىق سالىق سالۋ كەزەڭىمەن بايلانىستى بولۋى ىقتيمال.

اتاپ ايتقاندا، 27-مامىرعا دەيىن بيۋدجەتكە كورپوراتيۆتىك تابىس سالىعى، رەنتا سالىعى، پايدالى قازبالاردى ءوندىرۋ سالىعى جانە باسقالارى تولەنۋى ءتيىس.

بۇل رەتتە، دوللار- تەڭگە ۆاليۋتا جۇبىنىڭ ودان ءارى تومەندەۋى الەۋەتىن سىرتقى فاكتورلار شەكتەۋى مۇمكىن.

سونىڭ ىشىندە مۇناي باعاسىنىڭ قۇبىلمالىعى جانە فەدەرالدىق رەزەرۆتىك جۇيەنىڭ قاتاڭ ساياساتىنا جاۋاپ رەتىندە ا ق ش دوللارى يندەكسىنىڭ ءوسۋى اسەرى بار.

«جازعى دەمالىس ماۋسىمىنىڭ باستالۋى مەن مامىر ايىنداعى ۇزاق دەمالىس كۇندەرى قازاقستاندىقتاردىڭ شەتەل ۆاليۋتاسىنا دەگەن سۇرانىسىن ارتتىرۋى مۇمكىن» - دەيدى ساراپشى.

بۇعان دەيىن ساراپشىلار تەڭگەنىڭ نىعايۋ سەبەبىن اتاعان ەدى.

بيىل ساۋىردە تەڭگە باعامى 1,1 پايىزعا، ياعني 1 ا ق ش دوللارى ءۇشىن 442,05 تەڭگەگە دەيىن نىعايدى.

اۆتور

رۋسلان عابباسوۆ