مۇناي باعاسى 4,3 پايىزعا قىمباتتادى

استانا. KAZINFORM - سارسەنبى كۇنى يراننىڭ قورعانىس ءمينيسترى ا ق ش- پەن قاقتىعىس بولعان جاعدايدا تەگەران تاياۋ شىعىستاعى امەريكالىق بازالاردىڭ بارلىعىنا سوققى بەرەتىنىن مالىمدەدى. بۇل تۋرالى قازاقستان قارجىگەرلەر قاۋىمداستىعىنىڭ مالىمدەمەسىندە ايتىلعان.

تاياۋ شىعىستاعى گەوساياسي شيەلەنىستىڭ كۇشەيۋى جاعدايىندا «قارا التىننىڭ» باعاسى باررەلىنە 69,8 دوللارعا دەيىن (%4,3) كوتەرىلدى، بۇل جەتكىزىلىم ۇزىلىسىنە قاتىستى الاڭداۋشىلىقتى ارتتىرىپ وتىر.

سارسەنبى كۇنى ا ق ش مەملەكەتتىك دەپارتامەنتى مەن پەنتاگون تاياۋ شىعىستىڭ بىرنەشە ايماعىندا جاعدايدىڭ ناشارلاۋىنا بايلانىستى قىزمەتكەرلەردىڭ قىسقارتىلعانى تۋرالى حابارلادى.

ال، يران قورعانىس ءمينيسترى ازيز ناسيرزادە يادرولىق كەلىسسوزدەر ءساتسىز اياقتالىپ، ۆاشينگتونمەن قاقتىعىس تۋىنداسا، تەگەران ايماقتاعى امەريكالىق بازالارعا سوققى بەرەدى دەپ مالىمدەدى. بۇعان دەيىن دونالد ترامپ تاراپتار يادرولىق باعدارلاما بويىنشا جاڭا كەلىسىمگە كەلمەسە ءبىراز قيىندىق بولاتىنىن ايتىپ، يراندى بىرنەشە رەت قورقىتقان.

باعالار ا ق ش-تىڭ ەنەرگەتيكالىق اقپارات اكىمشىلىگىنىڭ (EIA) دەرەكتەرىمەن قوسىمشا راستالدى. ەسەپكە سايكەس، كوممەرتسيالىق مۇناي قورى 6 -ماۋسىمدا اياقتالعان اپتادا 3,6 ميلليون باررەلگە تومەندەدى. بۇل WSJ ساۋالناماسىنا قاتىسقان ساراپشىلاردىڭ بولجامىنان ايتارلىقتاي اسىپ ءتۇستى، ولار نەبارى 1,6 ميلليون باررەل تومەندەيدى دەپ كۇتكەن.

بۇعان دەيىن يراننىڭ مۇنايدان باسقا تاۋارىن ەكسپورتتايتىن 7 ەلدى اتاعانىن جازعان ەدىك.

اۆتور

ەركەجان سماعۇلوۆا