مەملەكەتتىك ساتىپ الۋ پورتالى ءبىر جىلدا 4,6 ميلليارد تەڭگە تاپقان
استانا. KAZINFORM - مەملەكەتتىك ساتىپ الۋ پورتالىن قولدانۋشىلار ءبىر جىلدا 4,6 ميلليارد تەڭگە اقى تولەگەن. قارجى ۆيتسە-ءمينيسترى داۋرەن كەڭبەيىل وسى قاراجاتتىڭ قايدا جۇمسالعانىن ايتتى.
ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ب ا ق وكىلى مەملەكەتتىك ساتىپ الۋ پورتالىن ۇستاۋعا بيۋدجەتتەن قانشا قاراجات جۇمسالاتىنىن سۇرادى.
«مەملەكەتتىك ساتىپ الۋ پورتالى اقىلى ەكەنىن بىلەسىزدەر. ونداعى تاريفتەر ءار ءتۇرلى، ساتىپ الۋ سوماسىنا بايلانىستى اقى الىنادى. بۇل اقىدان تۇسكەن اقشا تولىق كولەمدە وسى پورتالدى كۇتىپ ۇستاۋعا جانە قىزمەتىن قولداۋعا باعىتتالادى. 2023 -جىلدىڭ قورىتىندىسى بويىنشا 4,6 ميلليارد تەڭگەگە جۋىق قارجى جينالدى. ول اقشانىڭ ءبارى پورتالدى ۇستاۋعا باعىتتالادى. پورتالدى ۇستاۋدان ارتىلعان جاعدايدا رەسپۋبليكالىق بيۋدجەتكە ديۆيدەنت رەتىندە جولدانادى»، - دەدى ۆيتسە- مينيستر.
ونىڭ سوزىنشە، اتالمىش پورتال 2022 -جىلى اقپاراتتىڭ اشىقتىعى جونىنەن 109 ەلدىڭ ىشىندە ءۇشىنشى ورىن العان.
اۆتور
ەسىمجان ناقتىباي
