مەملەكەتتىك رامىزدەردى قولدانۋ ءىسىن جەتىلدىرۋ جونىندەگى جوسپار بەكىتىلەدى

استانا. KAZINFORM - مەملەكەتتىك رامىزدەردى قولدانۋ ءىسىن جەتىلدىرۋ جونىندەگى كەشەندى جوسپار بەكىتىلەدى. بۇل تۋرالى ءماجىلىس دەپۋتاتتارىنىڭ ساۋالىنا پرەمەر-ءمينيستردىڭ ءبىرىنشى ورىنباسارى رومان سكلياردىڭ جاۋابىندا ايتىلعان.

«بيىلعى وقۋ جىلىنان باستاپ بارلىق ءبىلىم بەرۋ ۇيىمىنا «ءبىرتۇتاس تاربيە باعدارلاماسى» ەنگىزىلدى. باعدارلاما مىندەتتەرىنىڭ ءبىرى - مەملەكەتتىك رامىزدەردى قۇرمەتتەۋگە، ەل بىرلىگىن ساقتاۋعا تاربيەلەۋ. سونىمەن قاتار بارلىق ءبىلىم بەرۋ ۇيىمى جىل سايىن 4-ماۋسىم مەملەكەتتىك رامىزدەر كۇنى رەتىندە ءتۇرلى يميدجدىك ءىس-شارالار وتكىزەدى. مەملەكەتتىك رامىزدەر تۋرالى اۋديو جانە بەينەروليكتەر كورسەتىلىپ، وقۋشىلار مەن پەداگوگتەر اراسىندا «قازاقستاننىڭ تۋىن قولدا»، «مەنىڭ تۋىم - مەنىڭ ماقتانىشىم» اتتى سونداي-اق «ءانۇران ورىنداۋ» چەللەندجدەرى ۇيىمداستىرىلادى»، - دەپ اتاپ وتەدى ءبىرىنشى ۆيتسە- پرەمەر.

ونىڭ اتاپ وتۋىنشە، مادەنيەت جانە اقپارات مينيسترلىگى اكىمدىكتەرمەن بىرلەسىپ، تۇراقتى تۇردە مەملەكەتتىك رامىزدەردىڭ زاڭ تالاپتارىنا سايكەس قولدانىلۋى جانە وزگە دە گەرالديكالىق ماسەلەلەر بويىنشا رەسپۋبليكالىق وقىتۋ سەمينارىن وتكىزىپ تۇرادى.

«ەلىمىزدە «وتاندى ءسۇيۋ - جۇرەكتەن» مەدياجوباسى، «تۋىمىز تورىمىزدە» اتتى جالپى ۇلتتىق اكسياسى وتكىزىلۋدە. موبيلدىك باعدارلاما «Aqyl battle» قوسىمشاسىنا مەملەكەتتىك رامىزدەرگە ارنالعان ارناۋلى بلوك ىسكە قوسىلدى. بۇدان بولەك قازاقستاندىق پاتريوتيزمدى ناسيحاتتاۋ جانە مەملەكەتتىك رامىزدەردى قولدانۋ ءىسىن جەتىلدىرۋ جونىندەگى 2024-2026 -جىلدارعا ارنالعان كەشەندى جوسپار پىسىقتالۋدا. ول ءبىرىنشى جارتىجىلدىقتا بەكىتىلەتىن بولادى»، - دەدى رومان سكليار.

اۆتور

مارلان جيەمباي