مەملەكەتتىك قىزمەتشىلەردىڭ انت بەرۋ ءماتىنى جەتىلدىرىلەدى
استانا. قازاقپارات - 2024 -جىلى ەلىمىز بويىنشا 15 مىڭنان اسا مەملەكەتتىك قىزمەتشى ءتۇرلى تارتىپتىك جاۋاپتىلىققا تارتىلدى. بۇل تۋرالى مەملەكەتتىك قىزمەت ىستەرى اگەنتتىگىندە 2024 -جىلدىڭ جۇمىس قورىتىندىسى بويىنشا وتكەن القا وتىرىسىندا اگەنتتىك ءتوراعاسى دارحان جازىقباي ءمالىم ەتتى.
- مەملەكەتتىك قىزمەتشىلەردىڭ انتقا ادال بولۋى نەگىزگى ۇستانىمعا اينالۋى ءتيىس. ءاربىر مەملەكەتتىك قىزمەتشى انت قابىلداعاندا ادال، ءادىل جانە ءوز مىندەتتەرىن ءمىنسىز ورىنداۋعا ۋادە بەرەدى. انت قوعام الدىنداعى جەكە مىندەتتەمە مەن جاۋاپكەرشىلىكتىڭ كورىنىسى. ول قوعامعا قىزمەت ەتۋ، ەل مۇددەلەرىن قورعاۋ جانە جوعارى مورالدىق قۇندىلىققا سايكەس ارەكەت ەتۋ مىندەتىن جۇكتەيدى. وسىعان وراي مەملەكەتتىك قىزمەتشىلەردىڭ انت ءماتىنى مەن انت بەرۋ راسىمدەرىن جەتىلدىرۋ بويىنشا ءتيىستى جۇمىستار جۇرگىزىلۋى كەرەك، - دەدى اگەنتتىك ءتوراعاسى.
القا وتىرىسىندا مەملەكەتتىك قىزمەت سالاسىن باقىلاۋ جۇمىسىندا الدىن الۋ شارالارىنا، ازاماتتار مەن مەملەكەتتىك قىزمەتشىلەردىڭ قۇقىعىن قورعاۋعا باسا نازار اۋدارىلاتىنى ايتىلدى. 2024 -جىلى اگەنتتىك جانە اۋماقتىق دەپارتامەنتتەر مەملەكەتتىك قىزمەت سالاسىنداعى زاڭنامانىڭ ساقتالۋىنا بايلانىستى تەكسەرىس ناتيجەسىندە 15 مىڭنان اسا تالاپتى بۇزۋ جاعدايىن انىقتادى.
- زاڭسىز قابىلدانعان 100-گە جۋىق اكتى مەن شەشىمنىڭ كۇشى جويىلىپ، 760 ازاماتتىڭ قۇقىقتارى قالپىنا كەلتىرىلدى. جالپى، 2024 -جىلى ەلىمىز بويىنشا 15 مىڭنان اسا مەملەكەتتىك قىزمەتشى ءتۇرلى تارتىپتىك جاۋاپتىلىققا تارتىلعان. قىزمەتتىك ادەپ نورمالارىن ساقتاماعانى ءۇشىن 310، ال مەملەكەتتىك قىزمەتكە كىر كەلتىرەتىن ارەكەت جاساعانى ءۇشىن 165 قىزمەتشى تارتىپتىك جاۋاپقا تارتىلدى، - دەدى دارحان جازىقباي.
اگەنتتىك باستاماسىمەن جازانىڭ بۇلتارتپاۋشىلىق پرينتسيپىن دايەكتى تۇردە جۇزەگە اسىرۋ مەحانيزمدەرى ايقىندالدى. وسى جىلدان باستاپ مەملەكەتتىك قىزمەتشىلەردىڭ باسقا مەملەكەتتىك ورگانعا اۋىسۋىنا قاراماستان، بۇرىنعى لاۋازىمدا جاساعان تەرىس قىلىقتار ءۇشىن جاۋاپتىلىقتان بوساتىلمايدى.
بۇدان بولەك، مەملەكەتتىك قىزمەتشىلەر اراسىندا زاڭنامالاردىڭ بۇزىلۋىن الدىن الۋدا ادەپ جونىندەگى ۋاكىلدەر ينستيتۋتى ماڭىزدى ءرول اتقارادى. 2024 -جىلى ادەپ جونىندەگى ۋاكىلدەر ازاماتتار مەن مەملەكەتتىك قىزمەتشىلەرگە 28 مىڭنان استام كونسۋلتاتيۆتىك كومەك كورسەتتى.
جاقىندا ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقايەۆ وتانشىل كادرلار باسشىلىق لاۋازىمدارعا تاعايىندالاتىنىن ايتتى.
اۆتور
رۋسلان عابباسوۆ
