مەملەكەتتىك كەڭەسشى تاريحشىلاردىڭ ۇلتتىق كونگرەسىنىڭ فورۋمىنا قاتىستى
استانا. KAZINFORM - وتاندىق عالىمدار قازاقستان تاريحىنا قاتىستى جاڭا اكادەميالىق كوپ تومدىق باسىلىم ازىرلەپ جاتىر. بۇل تۋرالى ەلوردادا مەملەكەتتىك كەڭەسشى ەرلان قاريننىڭ قاتىسۋىمەن وتكەن قازاقستان تاريحشىلارى ۇلتتىق كونگرەسىنىڭ فورۋمىندا ايتىلدى.

بۇل تۋرالى 24.kz جازدى.
القالى جيىندا ەلىمىزدەگى عىلىمي قاۋىمداستىقتىڭ 300 وكىلى باس قوستى. شاراعا تاريحشى- زەرتتەۋشىلەر، جوعارى وقۋ ورىندارىنىڭ وقىتۋشىلارى مەن قوعام قايراتكەرلەرى جينالدى.
فورۋمدا ارحەولوگيا، ەتنوگرافيا، ەتنولوگيا، تاريحي گەوگرافيا سالالارىنداعى جاڭالىقتاردى تالداۋ، جۇيەلەۋ جانە عىلىمي اينالىمعا ەنگىزۋ ماسەلەلەرى تالقىلاندى. وعان قوسا، قازاقستان زەرتتەۋشىلەرىنىڭ شەتەل مۇراعاتتارىندا، مۋزەيلەرى مەن كىتاپحانا قورلارىندا جۇرگىزگەن جۇمىس ناتيجەلەرى قارالدى.
- ارحەولوگيانىڭ مىسالىندا ايتاتىن بولساق، سوڭعى 25 جىلدا كوپتەگەن جاڭا اشىلىمدار اشىلدى. تاريحىمىزدى تولىعىمەن قايتا قاراۋعا ءماجبۇر ەتەدى. ارحەولوگيا ءپان ارالىق ۇلكەن عىلىمعا اينالدى. جاراتىلىس تانۋ عىلىمدارىنىڭ ادىستەمەلەرىن پايدالانا وتىرىپ، جاڭاشا اقپاراتتىڭ ءبارىن الىپ جاتىرمىز. ەجەلگى قوعام تۋرالى، ونىڭ پالەوەكونوميكاسى تۋرالى، شارۋاشىلىعى تۋرالى، دۇنيەتانىمى تۋرالى بۇرىنعى تاريحىمىزدى تولىعىمەن قايتا قاراۋعا مۇمكىندىگىمىز بار، - دەيدى ءا. مارعۇلان اتىنداعى ارحەولوگيا ينستيتۋتىنىڭ باس ديرەكتورى اقان وڭعار ۇلى.
جيىندا «قازاقستان تاريحى: ەجەلگى داۋىردەن بۇگىنگە دەيىن» اتتى جاڭا اكادەميالىق باسىلىمدى دايىنداۋ بارىسى تالقىلاندى. بۇل جوباعا بەس عىلىمي زەرتتەۋ ينستيتۋتى مەن ەلىمىزدىڭ 250-دەن استام عالىمى جۇمىلدىرىلعان. مەملەكەتتىك كەڭەسشى ءوز سوزىندە تاريحشىلاردىڭ ۇلتتىق كونگرەسى ەلىمىزدەگى تاريح عىلىمىن دامىتۋ تۇرعىسىنان ماڭىزى زور ەكەندىگىن ايتتى. وعان قوسا، سوڭعى جىلدارى عىلىمي اينالىمعا ەنگەن ارحەولوگيالىق ولجالار مەن ارحيۆتىك قۇجاتتار ۇلت تاريحىن ءبىرتۇتاس ءارى كەڭ اۋقىمدا قابىلداۋعا جول اشاتىندىعىن اتاپ ءوتتى.
-قازاقستان - كوشپەندىلەردىڭ ەجەلگى مەملەكەتتىك قۇرىلىمدارىنىڭ بەسىگى جانە ءبىر كەزدەگى قۋاتتى ەلدەر مەن يمپەريالاردىڭ مۇراگەرى عانا ەمەس، سونىمەن قاتار تۇتاس كوشپەندىلەر وركەنيەتىنىڭ وشاعى مەن ورتالىعى. سوندىقتان ۇلتتىق تاريح عىلىمىنىڭ مىندەتى - حالقىمىزدىڭ تاريحىنا وركەنيەتتىك پاراديگما تۇرعىسىنان اۋقىمدىراق جانە كەڭىرەك قاراۋ، ونى وسى ۇستانىم بويىنشا دارىپتەۋ، - دەدى ق ر مەملەكەتتىك كەڭەسشىسى ەرلان قارين.
فورۋمعا قاتىسۋشىلار ەجەلگى داۋىردەن بۇگىنگە دەيىنگى قازاقستان تاريحىنا قاتىستى كوپتومدىق اكادەميالىق باسىلىمدى ازىرلەۋ جۇمىستارىنا جوعارى باعا بەردى. سونداي-اق ارحەولوگيالىق جانە تاريحي-مادەني ەسكەرتكىشتەردى زەرتتەۋ اۋقىمىن كەڭەيتۋ، مۇراعات پەن ايماقتانۋ ءىسىن ودان ءارى دامىتۋ، وقۋلىقتاردى جانە تاريحتى وقىتۋ ادىستەمەسىن جەتىلدىرۋ سىندى تۇيتكىلدەرگە توقتالدى.