مەملەكەتتەن قولداۋ العان بانك قارىزىن تولىق قايتارماسا، ايىرماشىلىعىن باسقا بانكتەر وتەيدى - زاڭ جوباسى
استانا. KAZINFORM - قارجى نارىعىن رەتتەۋ جانە دامىتۋ اگەنتتىگىنىڭ ءتورايىمى ءمادينا ءابىلقاسىموۆا جاڭا زاڭ جوباسى بويىنشا مەملەكەتتەن قولداۋ العان بانكتىڭ اكسيونەرىن اۋىستىرۋ قالاي ىسكە اساتىنىن ايتتى.
- بۇرىن بانكتەرگە مەملەكەت قولداۋ كورسەتكەندە ءتۇرلى تەتىكتەر قولدانىلاتىن. مىسالى، ۇلتتىق بانك جەڭىلدىكپەن سۋبارديناتسيالانعان وبليگاتسيالار بەرەتىن. بۇل بانكتەر اراسىنداعى باسەكەنى ادىلەتسىز ەتتى. ودان كەيىن بانكتەردىڭ كۇيزەلىستەگى اكسيالارىن نومينالدى قۇنىمەن مەملەكەت ساتىپ الاتىن. بۇل بانكتىڭ شىعىنىن مەملەكەتتىڭ موينىنان ارتتى. ال بانك اكسيونەرى ورنىندا قالا بەرەتىن. سوندا بانكتى قيىن جاعدايعا جەتكىزگەن اكسيونەر ورنىن قالىپ، مەملەكەتتەن كومەك الاتىن. ەندى بانك تولەم قابىلەتىنەن ايىرىلسا، اكسيونەر اۋىسادى. ياعني، اكسيونەردىڭ كاپيتالى تولىق ەسەپتەن شىعارىلادى. اكسيونەردىڭ بۇكىل اقشاسى، سالعان سالىمى بانك شىعىندارىن جابۋعا الىنادى. ودان كەيىن مىندەتتەمەلەر كونۆەرتاتسيالانادى. ونداي مىندەتتەمەلەردىڭ ءتىزىمى بار. ياعني، وبليگاتسيالار مەن شىعارىلعان بورىشتارى دا شىعىندى جابۋعا جۇمسالادى. وسىلاردىڭ ءبارى قارجى جۇيەسىن تۇراقتاندىرۋعا جەتپەگەن جاعدايدا عانا مەملەكەت اكسيونەرلىك كاپيتالعا كىرۋ ارقىلى قولداۋ كورسەتەدى، - دەدى ول.
ءمادينا ءابىلقاسىموۆا «مەملەكەت قارجىلاي قيىندىققا تاپ بولعان بانكتى قولداماي تۇرىپ، اۋەلى ونى جابا سالۋ ءتيىمدى مە؟» دەگەن سۇراققا باعا بەرىلەتىنىن ايتادى.
- شەشىم قابىلدانعاننان كەيىن عانا مەملەكەت بانكتىڭ اكسيونەرى بولىپ كىرەدى. قارجىلىق تۇراقتىلىق قالپىنا كەلگەن سوڭ مەملەكەت بانكتى جاڭا ينۆەستورعا ساتادى. ينۆەستورعا بانكتى ساتقان كەزدە مەملەكەت اكسيونەر رەتىندە سالعان اقشا تۇگەل قايتپاسا، ول ايىرماشىلىقتى باسقا ەكىنشى دەڭگەيدەگى بانكتەر بىرلەسىپ جابادى. ول ءۇشىن ەكىنشى دەڭگەيدەگى بانكتەر قور قۇرۋعا مىندەتتەلەدى. ياعني، ءبىر بانككە قولداۋ كورسەتۋدەن مەملەكەت شىعىن شەكسە، قالعان بانكتەر ونى بىرلەسىپ وتەيدى، - دەدى اگەنتتىك باسشىسى.
ايتا كەتەيىك، ءدال قازىر ۇلتتىق بانك پەن قارجى نارىعىن دامىتۋ جانە رەتتەۋ اگەنتتىگى ماجىلىستە بانكتەر تۋرالى زاڭ جوباسى تانىستىرىپ جاتىر.
اۆتور
ەسىمجان ناقتىباي
