مەملەكەتارالىق ارازدىققا شاقىراتىن شەتەلدىكتەردىڭ وزبەكستانعا كىرۋىنە تىيىم سالىنادى

تاشكەنت. KAZINFORM - وزبەكستان پرەزيدەنتى شاۆكات ميرزييەۆ تۇزەتۋ ەنگىزىلگەن «وزبەكستانداعى شەتەل ازاماتتارى مەن ازاماتتىعى جوق ادامداردىڭ قۇقىقتىق جاعدايى تۋرالى» زاڭىنا قول قويدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

قۇجاتقا ساي، ۇلتارالىق، الەۋمەتتىك جانە مەملەكەتارالىق ارازدىققا شاقىراتىن شەتەلدىكتەر ەندى ەلگە كىرۋگە نەمەسە تۇرۋعا قۇقىلى ەمەس دەپ تانىلادى. ونداي ازاماتتار زاڭ شىعارۋ پالاتاسىنىڭ كەنگاشتارتى، سەنات پەن ارنايى ۋاكىلەتتى ورگانداردىڭ ۇسىنىسى نەگىزىندە ارنايى تىزىمگە ەنگىزىلەدى.

وسى رەتتە ەل ۇكىمەتىنە 1 ايدىڭ ىشىندە شەتەلدىكتەردى اتالعان تىزىمگە ەنگىزۋ ءتارتىبىن بەكىتۋ تاپسىرىلدى. رەەستردى وزبەكستاننىڭ سىرتقى ىستەر مينيسترلىگى جۇرگىزەدى.

تىزىمگە ەنگەن ازاماتتارعا وزبەكستانعا كىرۋگە، بانك شوتىن اشۋعا، جىلجىمايتىن مۇلىك ساتىپ الۋعا، مەملەكەتتىك مۇلىكتى جەكەشەلەندىرۋگە جانە ءتۇرلى سالادا كەلىسىمدەر جاساۋىنا تىيىم سالىنادى.

ولار ءتيىستى رەەستردە 5 جىل تۇرادى. ەگەر وسى ۋاقىت ىشىندە ازامات ءوزىنىڭ تەرىس كوزقاراسىنان اينىماسا، ول تىزىمدە 5 جىلدان كەيىن دە قالا بەرەدى.

وزبەكستاندا تۇراقتى نەمەسە ۋاقىتشا تۇراتىن شەتەلدىك پەن ازاماتتىعى جوق ادام تىزىمگە ەنگەنى تۋرالى حابارلاما العاننان كەيىن 10 كۇن ىشىندە ءوز ەركىمەن ەلدەن كەتۋى ءتيىس.

تالاپتى ەلەمەگەن جاعدايدا ول ازامات ىشكى ىستەر ورگاندارى جانە وزگە دە ۋاكىلەتتى ۆەدومستۆولاردىڭ ارالاسۋىمەن دەپورتاتسيالانادى. ول ۋاقىتتا شەتەلدىككە بەرىلگەن ۆيزا دا كۇشىن جويادى.

اۆتور

ءاليحان اسقار